Америка дөләт мәҗлиси 17‏-өктәбир гуваһлиқ йиғини өткүзүп, уйғур районидики «мәҗбури әмгәк, тутқун вә иҗтимаий контроллуқ» һәққидә пикир алиду

Мухбиримиз әркин
2019-10-16
Елхәт
Пикир
Share
Принт

Америка дөләт мәҗлисиниң хитай ишлири комитети 17‏-өктәбир күни дөләт мәҗлисидә «шинҗаңдики мәҗбури әмгәк, кәң көләмлик тутқун вә иҗтимаий контроллуқ» дегән темида гуваһлиқ йиғини өткүзиду. Бу, америка һөкүмити өткән һәптә уйғур районида кишилик һоқуқни дәпсәндә қилишқа қатнашқан 8 хитай ширкити вә районидики 20 дәк җ х идарисини қара тизимликкә киргүзүп, бәзи хитай әмәлдарлириға виза ембаргоси қойидиғанлиқини җакарлиғандин кейин өткүзүлидиған уйғурлар һәққидики тунҗи гуваһлиқ йиғинидур.

Америка дөләт мәҗлиси хитай ишлири комитетиниң бу һәққидики баянатида тәкитлинишичә, «гуваһлиқ йиғини шинҗаң уйғур аптоном районидики мәҗбури әмгәк, кәң көләмлик тутқун, иҗтимаий контроллуқни көрүп чиқип, шаһитларниң районда йүз бериватқан мәҗбури әмгәк вә башқа қорқунчлуқ кишилик һоқуқ дәпсәндичиликигә даир гуваһлиқ сөзлирини аңлайдикән, шундақла шинҗаң уйғур аптоном районидики мәҗбури әмгәк лагерлирида мәһсулатларниң қандақ ишләпчиқирилип, йәр шари тәминат базириға кириватқанлиқини ениқлайдикән вә америка һөкүмити һәм дөләт мәҗлисигә тәвсийәләрдә болидикән.» 

Баянатта йәнә, хитайниң кәң көләмлик тутқун, мәҗбури әмгәк вә башқа сиясәтләрни ишқа селип, әнәниви мәдәнийәт вә диний ибадәтни йоқитишқа урунушиниң у имза қойған хәлқара универсал кишилик һоқуқ әһдинамисидә үстигә алған мәҗбурийәтлиригә хилап икәнлики тәкитләнгән. Бу қетимқи гуваһлиқ йиғинида, адриан зәнс, нури түркәл, майкел познер, әмий леһр қатарлиқ мутәхәссис вә паалийәтчиләр гуваһлиқ бериду. Лекин, бу йиғин кәлгүси бир һәптә ичидә вашингтонда өткүзүлидиған уйғурлар һәққидики бирдин-бир йиғин әмәс. Мәлум болушичә, 23‏-өктәбир күни дөләт мәҗлисидә «хитайниң уйғурларға қаратқан дөләт ичи вә сиртидики бастуруши» намлиқ йәнә бир йиғин чақирилидикән.

«Хитай ярдәм җәмийити», «әркинлик сарийи», «җорҗ боз институти», «уйғур кишилик һоқуқ қурулуши» қатарлиқ тәшкилат вә тәтқиқат орунлириниң саһибханилиқида өткүзүлидиған бу йиғинда, авам палата әзаси там созе ечилиш нутқи сөзләйдикән.

Пикирләр (0)
Share
Толуқ бәт