Amérika dölet mejlisi 17‏-öktebir guwahliq yighini ötküzüp, Uyghur rayonidiki "Mejburi emgek, tutqun we ijtima'iy kontrolluq" heqqide pikir alidu

Muxbirimiz erkin
2019-10-16
Élxet
Pikir
Share
Print

Amérika dölet mejlisining xitay ishliri komitéti 17‏-öktebir küni dölet mejliside "Shinjangdiki mejburi emgek, keng kölemlik tutqun we ijtima'iy kontrolluq" dégen témida guwahliq yighini ötküzidu. Bu, amérika hökümiti ötken hepte Uyghur rayonida kishilik hoquqni depsende qilishqa qatnashqan 8 xitay shirkiti we rayonidiki 20 dek j x idarisini qara tizimlikke kirgüzüp, bezi xitay emeldarlirigha wiza émbargosi qoyidighanliqini jakarlighandin kéyin ötküzülidighan Uyghurlar heqqidiki tunji guwahliq yighinidur.

Amérika dölet mejlisi xitay ishliri komitétining bu heqqidiki bayanatida tekitlinishiche, "Guwahliq yighini shinjang Uyghur aptonom rayonidiki mejburi emgek, keng kölemlik tutqun, ijtima'iy kontrolluqni körüp chiqip, shahitlarning rayonda yüz bériwatqan mejburi emgek we bashqa qorqunchluq kishilik hoquq depsendichilikige da'ir guwahliq sözlirini anglaydiken, shundaqla shinjang Uyghur aptonom rayonidiki mejburi emgek lagérlirida mehsulatlarning qandaq ishlepchiqirilip, yer shari teminat bazirigha kiriwatqanliqini éniqlaydiken we amérika hökümiti hem dölet mejlisige tewsiyelerde bolidiken." 

Bayanatta yene, xitayning keng kölemlik tutqun, mejburi emgek we bashqa siyasetlerni ishqa sélip, en'eniwi medeniyet we diniy ibadetni yoqitishqa urunushining u imza qoyghan xelq'ara uniwérsal kishilik hoquq ehdinamiside üstige alghan mejburiyetlirige xilap ikenliki tekitlen'gen. Bu qétimqi guwahliq yighinida, adri'an zens, nuri türkel, maykél poznér, emiy léhr qatarliq mutexessis we pa'aliyetchiler guwahliq béridu. Lékin, bu yighin kelgüsi bir hepte ichide washin'gtonda ötküzülidighan Uyghurlar heqqidiki birdin-bir yighin emes. Melum bolushiche, 23‏-öktebir küni dölet mejliside "Xitayning Uyghurlargha qaratqan dölet ichi we sirtidiki basturushi" namliq yene bir yighin chaqirilidiken.

"Xitay yardem jem'iyiti", "Erkinlik sariyi", "Jorj boz instituti", "Uyghur kishilik hoquq qurulushi" qatarliq teshkilat we tetqiqat orunlirining sahibxaniliqida ötküzülidighan bu yighinda, awam palata ezasi tam sozé échilish nutqi sözleydiken.

Toluq bet