Amérika tashqiy ishlar ministirliqi Uyghurlar mesilisi heqqide bir qisqa filim tarqitip xitayni eyiblidi

Amérika tashqiy ishlar ministirliqi Uyghur mesiliside xitaygha qaratqan tenqidlirini qattiq kücheytmekte.

Amérika tashqiy ishlar ministirliqi 1-noyabir küni Uyghurlargha qiliniwatqan zulum we lagér tüzümi tonushturulghan qisqa filimni özining tiwittér we féysbuk qatarliq ijtima'iy taratqulardiki resmiy hésabi arqiliq tarqatti. 

Yuqiriqi bu qisqa filimde xitay hökümitining bir milyondin oshuq Uyghurni “Qayta terbiye” namida lagérlargha qamap, ularni rohiy we jismaniy jehettin iskenjige éliwatqanliqi heqqide ishenchlik doklatlar barliqi bayan qilin'ghan we buninggha munasiwetlik körünüshler bérilgen. Qisqa filimde yene amérika tashqiy ishlar ministiri mayk pompéyo “Biz xitay hökümitini öz asasiy qanunlirigha emel qilip, puqralirining eng négizlik hoqoqlirigha hörmet qilishqa chaqirimiz,” dégen. 

Arqidin yene amérika tashqiy ishlar ministirliqi yene tiwittér arqiliq xitay heqqide bir bayanat élan qildi. Uningda töwendikidek sözler yer alghan: “Xitay kompartiyesi élishish we xelq'arani kontrol astigha élishqila merkezleshken bir markist we lénénchi partiye”. 

Tashqiy ishlar ministirliqi yene tiwittér yollanmisida “Xitay hökümiti öz puqralirining eng asasiy hoquqlirini ret qilmaqta. Biz buning misallirini ular wedisige emel qilishqa tégishlik bolghan xongkongda körüwatimiz we shundaqla éghir kishilik hoquq depsendichiliki yürgüzülüwatqan shinjangda körüwatimiz,” dégen. 

Mayk pompéyo 03-öktebir küni “Xudson inistituti” da mexsus xitay heqqide muhim notuq sözligen idi. U shu kündiki nutuqida: “Xitay dunyani kontrol astigha élish üchün heriket qiliwatidu. Biz buninggha choqum taqabil turushimiz kérek,” dégen.

Amérika tashqiy ishlar minsitirliqining yuqiriqi bayanliri amérikaning xitaygha qaratqan siyasetliridiki zor özgirishtin dérek béridiken.