Amérika tashqi ishlar ministirliqi: "Xitayning térrorluqqa qarshi turush herikiti Uyghur millitini nishan qilghan"

Muxbirimiz erkin
2019-11-04
Élxet
Pikir
Share
Print

Amérika tashqi ishlar ministirliqi 1‏-noyabir küni özining térrorluq heqqidiki yilliq doklatini élan qilip, xitayning térrorluq we esebiylikke qarshi turush herikitining Uyghurlarni nishan qilghanliqini ilgiri sürgen. Doklatta, xitayning térrorluq mesilisidiki asasliq düshminining Uyghurlardiki atalmish "Radikallar" ikenliki tekitlinip, béyjing bu radikallarni "Sherqiy türkistan islam herikiti" dep teripleydighanliqi tekitlen'gen. Lékin doklatta qeyt qilinishiche, xitayning térrorluqqa qayturghan inkasi bilen uning tinch öktichi pa'aliyetlerge tutqan mu'amilisini perqlendürmek müshkül iken.

Doklatta, xitay kompartiyesining 2017‏-yildin béri shinjang Uyghur aptonom rayonida térrorluqni bahane qilip, bir milyondin artuq Uyghur we bashqa musulman milletlerni lagérlargha qamighanliqi, ikki milyondin artuq kishining kündilik siyasi öginishke orunlashturghanliqi tekitlen'gen. Doklatta qeyt qilinishiche, xitay yene yéngi qanuni belgilime we qanuni wastilarni qollinip, nazaret téxnikisi, shexsiy uchur toplash, d n a ewrishkisi yighish, hökümet emeldarlirini Uyghurlarning öyige orunlashturush, ularning diniy we medeniyitini kontrol qilish qatarliqlar arqiliq özining basturush iqtidarini yuqiri kötergen. 

Doklatta yene 2018‏-yili 6‏-ayda xitay edliye tarmaqlirining térrorluq jinayetlirige da'ir yéngi belgilime chiqirip, térrorluq-esebiylikni terghip qilidighan kiyim-kéchek we simwollarni kiyish yaki taqashni chekligenliki, torda térrorluqqa da'ir maqale yazghan, élan qilghan yaki uninggha da'ir sin körünüshlirini tarqatqanlarning jinayi jawabkarliqqa tartilidighanliqini élan qilghanliqi, shu yili 10‏-ayda Uyghur aptonom rayonining mewjut belgilimige tüzitish kirgüzüp, "Kespiy téxnika terbiyelesh merkezliri" ni qanunlashturghanliqi tekitlen'gen. Doklatta, "Sün'iy hemrah resimliri, shahitlarning guwahliqi we kishilik hoquq teshkilatlirining doklatlirida tikenlik sim tosaqlar bilen oralghan, közitish munariliq we tek ishiklik bu merkezlerning türme bilen oxshash ikenliki qeyt qilin'ghanliqi bildürülgen.

Toluq bet