Аддисон мәктаг: «хитайға хәт - уйғур достум зәйнур қәйәрдә?»

Мухбиримиз әркин
2019-11-13
Елхәт
Пикир
Share
Принт

Уйғур дияридики сиясий бастурушта лагерларға қамилип кәткәнләр арисида зор сандики оттура яш вә яшинип қалған зиялилардин башқа әмдиләтин җәмийәт босуғисини атлаватқан яш боғунларму көп санлиқни тәшкил қилиду. 2017-Йили язда бейҗиң химийә санаити инистутутини пүттүргән 24 яшлиқ зәйнур турди дәл әнә шуларниң биридур.

13-Ноябир күни зәйнурниң илгирики достлиридин бири, харвард университетиниң оқуғучиси аддисон мәктаг хитай һөкүмитигә очуқ хәт йезип, өзи бейҗиңдики қисқиғинә өгиниш мәзгилидә тонушқан уйғур дости зәйнурниң издәк-сориқини қилди. 

Аддисон мәктаг бир мусулман қиз болуш сүпити билән әйни вақитта бейҗиңда оқуватқан зәйнур билән тезла йеқин достлардин болуп қалған. Һәр иккисиниң ислам йосунида кийиниши вә ислам диниға болған муһәббити улардики бир ортақлиқ болса, йәнә бир яқтин һәр иккисиниң яш җәһәттә бәк пәрқ қилип кәтмәйдиғанлиқи һәмдә һәр иккисиниң алий мәктәп оқуғучиси болуши улардики йәнә бир ортақлиқ болуп қалған. Әмма аддисон америкаға қайтип келип узун өтмәй уйғур дости зәйнурниң қәшқәрдә уштумтутла ғайип болуп кәткәнликини аңлиған. 

Аддисон мәктаг очуқ хетидә алий мәктәп оқуғучиси болған зәйнурниң толиму тәқва бир мусулман қиз икәнликини, әмма хитай һөкүмитиниң уйғурларни мәсчитләрдин чәкләш, көплигән биһудә диний чәклимиләрни иҗра қилиш, һәммила йәргә көзитиш камераси орнитиш, уйғурларниң паспортини йиғивелиштәк «бихәтәрлик» тәдбирлириниң ашу биғубар достини ютуп кәткәнликини әйибләйду. 

У «шаһит биз» ториға бәргән гуваһлиқида зәйнурниң бейҗиңда оқуш җәрянида ятиқидики бәш хитай қизниң алдида намаз оқуғанлиқи, мәктәп даирилириниң һеҗабни еливетиш һәққидики тәклипини қәтий рәт қилиши, акисиниң мисирда оқуғанлиқи дегәндәк сәвәбләрниң униң тутқун қилинишиға сәвәб болған болуши мумкинликини билдүргән иди.

Пикирләр (0)
Share
Толуқ бәт