Addison mektag: "Xitaygha xet - Uyghur dostum zeynur qeyerde?"

Muxbirimiz erkin
2019-11-13
Élxet
Pikir
Share
Print

Uyghur diyaridiki siyasiy basturushta lagérlargha qamilip ketkenler arisida zor sandiki ottura yash we yashinip qalghan ziyalilardin bashqa emdiletin jem'iyet bosughisini atlawatqan yash boghunlarmu köp sanliqni teshkil qilidu. 2017-Yili yazda béyjing ximiye sana'iti inistututini püttürgen 24 yashliq zeynur turdi del ene shularning biridur.

13-Noyabir küni zeynurning ilgiriki dostliridin biri, xarward uniwérsitétining oqughuchisi addison mektag xitay hökümitige ochuq xet yézip, özi béyjingdiki qisqighine öginish mezgilide tonushqan Uyghur dosti zeynurning izdek-soriqini qildi. 

Addison mektag bir musulman qiz bolush süpiti bilen eyni waqitta béyjingda oquwatqan zeynur bilen tézla yéqin dostlardin bolup qalghan. Her ikkisining islam yosunida kiyinishi we islam dinigha bolghan muhebbiti ulardiki bir ortaqliq bolsa, yene bir yaqtin her ikkisining yash jehette bek perq qilip ketmeydighanliqi hemde her ikkisining aliy mektep oqughuchisi bolushi ulardiki yene bir ortaqliq bolup qalghan. Emma addison amérikagha qaytip kélip uzun ötmey Uyghur dosti zeynurning qeshqerde ushtumtutla ghayip bolup ketkenlikini anglighan. 

Addison mektag ochuq xétide aliy mektep oqughuchisi bolghan zeynurning tolimu teqwa bir musulman qiz ikenlikini, emma xitay hökümitining Uyghurlarni meschitlerdin cheklesh, köpligen bihude diniy cheklimilerni ijra qilish, hemmila yerge közitish kamérasi ornitish, Uyghurlarning pasportini yighiwélishtek "Bixeterlik" tedbirlirining ashu bighubar dostini yutup ketkenlikini eyibleydu. 

U "Shahit biz" torigha bergen guwahliqida zeynurning béyjingda oqush jeryanida yatiqidiki besh xitay qizning aldida namaz oqughanliqi, mektep da'irilirining héjabni éliwétish heqqidiki teklipini qet'iy ret qilishi, akisining misirda oqughanliqi dégendek seweblerning uning tutqun qilinishigha seweb bolghan bolushi mumkinlikini bildürgen idi.

Toluq bet