Америка ташқи ишлар министирлиқи аилә тавабиатлири хитай лагерлирида ғайиб болған уйғур қиз-аяллириниң видейосини ишләп елан қилди

Мухбиримиз әркин
2020-12-11
Share

Америка ташқи ишлар министирлиқи 10-декабир "хәлқара кишилик һоқуқ күни" мунасивити билән аилә тавабиатлири хитай лагерлирида ғайиб болған уйғур қиз-аяллириниң видейосини тарқитип, уйғурларниң дәпсәндә қилинишида җавабкарлиқи бар шәхс, органларни җазалашни давамлаштуридиғанлиқини билдүрди. Американиң йәр шари аяллар ишлириға мәсул баш әлчиси кәрий кюри бу мунасивәт билән елан қилған баянатида "шинҗаң вәзийитиниң дәвримиздики әң чоң кишилик һоқуқ кризиси" икәнликини тәкитлигән.

Униң қәйт қилишичә, "хитай компартийәси уйғур мәдәнийити вә кимликини йимирип, пүткүл нупусини хитайлаштурушқа урунмақта" икән. У йәнә "хитай даирилириниң болупму уйғур аяллириға қарита мәҗбурий туғмас қилиш, бала чүшүрүш вә башқа нопус контрол қилиш васитилирини ишлитиватқанлиқи" ни билдүргән. Видейода хитай лагерида ғайиб болған уйғурлардин доктор гүлшән аббасниң америкадики қизи зиба мурат билән тәтқиқатчи раһилә давутниң қизи әқидә полат вә әркин асия радийосиниң мухбири гүлчеһрә хоҗаниң сөзлиригә орун берилгән.

Зиба мурат сөзидә "әгәр аниси һаят болса уни өзлириниң билиши керәклики вә уни қайтуруп келишкә ярдәм қилиш" ни тәләп қилған. Әқидә полат "хәлқара җамаәт вә кишилик һоқуқ тәшкилатлириниң хитай һөкүмитини җавабкарлиққа тартишини үмид қилидиғанлиқи" ни билдүргән. Гүлчеһрә хоҗа уйғурларниң хитай болуш яки өлүштин ибарәт икки йолдин бирини таллашқа мәҗбурлиниватқанлиқини билдүрүп: "әгәр хитайға қарши дәрһал вә үнүмлүк чарә қолланмиса, бәлким биз пат йеқинда һалак болушимиз мумкин," дәп тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт