Amérika tashqi ishlar ministirliqi a'ile tawabi'atliri xitay lagérlirida ghayib bolghan Uyghur qiz-ayallirining widéyosini ishlep élan qildi

Muxbirimiz erkin
2020-12-11
Share

Amérika tashqi ishlar ministirliqi 10-dékabir "Xelq'ara kishilik hoquq küni" munasiwiti bilen a'ile tawabi'atliri xitay lagérlirida ghayib bolghan Uyghur qiz-ayallirining widéyosini tarqitip, Uyghurlarning depsende qilinishida jawabkarliqi bar shexs, organlarni jazalashni dawamlashturidighanliqini bildürdi. Amérikaning yer shari ayallar ishlirigha mes'ul bash elchisi keriy kyuri bu munasiwet bilen élan qilghan bayanatida "Shinjang weziyitining dewrimizdiki eng chong kishilik hoquq krizisi" ikenlikini tekitligen.

Uning qeyt qilishiche, "Xitay kompartiyesi Uyghur medeniyiti we kimlikini yimirip, pütkül nupusini xitaylashturushqa urunmaqta" iken. U yene "Xitay da'irilirining bolupmu Uyghur ayallirigha qarita mejburiy tughmas qilish, bala chüshürüsh we bashqa nopus kontrol qilish wasitilirini ishlitiwatqanliqi" ni bildürgen. Widéyoda xitay lagérida ghayib bolghan Uyghurlardin doktor gülshen abbasning amérikadiki qizi ziba murat bilen tetqiqatchi rahile dawutning qizi eqide polat we erkin asiya radiyosining muxbiri gülchéhre xojaning sözlirige orun bérilgen.

Ziba murat sözide "Eger anisi hayat bolsa uni özlirining bilishi kérekliki we uni qayturup kélishke yardem qilish" ni telep qilghan. Eqide polat "Xelq'ara jama'et we kishilik hoquq teshkilatlirining xitay hökümitini jawabkarliqqa tartishini ümid qilidighanliqi" ni bildürgen. Gülchéhre xoja Uyghurlarning xitay bolush yaki ölüshtin ibaret ikki yoldin birini tallashqa mejburliniwatqanliqini bildürüp: "Eger xitaygha qarshi derhal we ünümlük chare qollanmisa, belkim biz pat yéqinda halak bolushimiz mumkin," dep tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet