Америкада хитай үчүн хизмәт қиливатқан җасуслар қолға елинди, бир хитай тәшкилати «чәтәл вакаләтханиси» дәп бекитилди

Мухбиримиз ирадә
2020-10-29
Share

Америка һөкүмити америка земинида туруп, хитай компартийиси үчүн хизмәт қиливатқан органларни бекитип чиқишни вә буниңға четилған шәхсләргә тәдбир қоллинишни давамлаштурмақта.

28-Өктәбир күни америка ташқи ишлар министирлиқи хитайниң мәркизи бирликсәп бөлүминиң контроллуқидики тәшкилат болған «хитайни тинчлиқ билән бирликкә кәлтүрүш мәмликәтлик бирләшмиси» (NACPU) ни «чәтәл вакаләтханиси», йәни җуңхуа хәлқ җумһурийитиниң биваситә контроллуқидики орган дәп бекитти.

Америка ташқи ишлар министирлиқи бу һәқтики баянатида мундақ дегән: «бундақ қилишимиздики мәқсәт бу тәшкилатларниң характери һәққидә кишиләрниң көзини ечиш, җүмлидин бу органларниң биваситә бейҗиңдин буйруқ алидиғанлиқини ениқ билдүрүп қоюштур. Биз бу йил авғустта куңзи институтиниму хитайниң чәтәлләрдики вакаләтханиси қилип бекиткән идуқ.»

Америка ташқи ишлар министирлиқиниң баянатида йәнә мундақ дейилгән: «хитай мәркизи бирликсәп бөлүми хитай коммунистик партийәсиниң бир оргини болуп, у өтичиләрниң хитай компартийәсиниң һакимийәттики орниға болған тәһдитни йоқитиш, битәрәпләштүрүш һәм шундақла хитай компартийәсиниң тәшвиқатини чәтәлләргә тарқитиш вәзиписини үстигә алған.»

Америка йәнә америка билән хитай арисида 2011-йили имзаланған бир достлуқ келишимигә асасән елип бериливатқан икки дөләттики һәрқайси йәрлик һөкүмәтләр рәһбәрлири вә хәлқләрниң достлуқ учришиши дегәндәк паалийәтләрниму бикар қилған.

28-Өктәбир күни йәнә америкада 5 нәпәр хитай җасуси қолға елинған. «Вашингтон почтиси» гезитиниң илгири сүрүшичә, америка федератсийә тәкшүрүш идариси «түлкә ови» намлиқ һәрикәт арқилиқ хитай үчүн җасуслуқ қилған 5 кишини қолға алған. Улар америкадики хитай сиясий өктичиләр яки хитай һөкүмитини тәнқид қилғучиларни нишан қилип, уларға тәһдит қилиш, уларниң хитайдики аилә тавабиатлирини қисмаққа елиш арқилиқ уларни хитайға қайтишқа мәҗбурлаштәк һәрикәтләр билән шуғулланған икән.

Америка федератсийә тәкшүрүш идарисиниң башлиқи кристофир рей хитай һөкүмитиниң америка туприқида туруп бундақ һәрикәтләр билән шуғуллинишиниң қанунға хилаплиқини әскәртип: «хитай қанун-түзүмләргә тохтимай хилаплиқ қиливатиду,» дегән. Қолға елинғанлар ню-йорк, нйв-җерсий вә калифорнийә штатлиридин болуп, улар җу йоң, хуң руҗин, роң җиң вә җең коңйиң вә майкил макмахонлар икән. Майкил макмахон нйв-җерсий штатида олтурушлуқ бир хусусий разведчик болуп, у юқириқи хитай җасуслириниң хитайға қарши паалийәтчиләргә тәһдит селиш вә бесим қилиш ишлириға ярдәм бәргән икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт