Қәшқәр вилайитидә кадирлардин «үч ақ ташлиқ» китаб бойичә имтиһан елинған

Мухбиримиз ирадә
2019-11-27
Елхәт
Пикир
Share
Принт

Хитай даирилири йеқиндин буян уйғур елидики сиясий тәшвиқат долқунини йәнә бир балдақ юқири көтүрүп, ши җинпиңниң шинҗаңни идарә қилиш тәдбирини өгиниш, шинҗаңға мунасивәтлик елан қилинған бир қатар «ақ ташлиқ китаблар» ни өгиниш қатарлиқ һәрикәтләрни қозғиған иди.

«Қәшқәр хәвәрләр тори» тарқатқан хәвәргә қариғанда, даириләр мушу айниң 23-күни қәшқәр вилайитидики муавин наһийә дәриҗиликтин юқири кадирлардин «үч ақ ташлиқ китаб» бойичә имтиһан алған болуп, имтиһанға қәшқәр вилайитигә биваситә қарашлиқ орунлардики наһийә, башқарма дәриҗилик 483 нәпәр кадир һәм шундақла 12 наһийә (шәһәр) дики наһийә, башқарма дәриҗилик 652 нәпәр кадир болуп, җәмий 1200 гә йеқин киши қатнашқан.

Имтиһанға киргән кадирлар «шинҗаңниң террорлуққа қарши туруш, әсәбийликни түгитиш күриши вә кишилик һоқуқ капалити», «шинҗаңға даир бир қанчә тарихий мәсилә» «шинҗаңдики кәспий маһарәт тәлим-тәрбийә хизмити» дин ибарәт «үч ақ ташлиқ китаб» тики мәзмунларға мунасивәтлик 90 минутлуқ имтиһанға қатнашқан.

Хәвәрдә төвәндикиләр баян қилинған: «пүтүн қәшқәр вилайитидә ‹үч ақ ташлиқ китаб' асасий билимлиридин мәркәзлик имтиһан елишни қанат яйдуруштики мәқсәт кәң партийә әзалири вә кадирларға шинҗаңниң тарих, милләт, мәдәнийәт, дин қатарлиқ мәсилилирини дәл җайида тонутуш. . . Чегра ичи-сиртидики дүшмән күчләрниң тарихни бурмилайдиған, һәқ-наһәқни астин-үстүн қеливетидиған хата сәпсәтисигә күчлүк рәддийә бериш, асасидин түзәп мәнбәдин саплаштуруп. . . Қудрәтлик актип күч тарқитиштин ибарәт.»

Диққәт қозғайдиғини «шинҗаңға нишанлиқ ярдәм бериш» дегән түр бойичә кәлгән кадирларму бу имтиһанға қатнаштурулған болуп, униңда йәнә кадирларниң имтиһан нәтиҗиси «йил ахиридики баһалашниң муһим асаси қилиниду,» дейилгән.

Йеқиндин буян ашкарилиниватқан бир қисим хәвәрләрдә, хитай һөкүмити уйғур елидә пәйда қиливатқан дәриҗидин ташқири сиясий атмосфераниң шу җайдики хитай кадир аммисиниму бизар қиливатқанлиқи мәлум болған. Бәзи хитайлар һәтта иҗтимаий таратқуларда хитай өлкилиридики хитайларға хитаб қилип: «шинҗаңға кәлмәсликни, болмиса бу йәрдә түгимәс сиясий йиғинларниң тутқуниға айлинидиғанлиқини» агаһландурған иди.

Пикирләр (0)
Share
Толуқ бәт