Qeshqer wilayitide kadirlardin "Üch aq tashliq" kitab boyiche imtihan élin'ghan

Muxbirimiz irade
2019-11-27
Élxet
Pikir
Share
Print

Xitay da'iriliri yéqindin buyan Uyghur élidiki siyasiy teshwiqat dolqunini yene bir baldaq yuqiri kötürüp, shi jinpingning shinjangni idare qilish tedbirini öginish, shinjanggha munasiwetlik élan qilin'ghan bir qatar "Aq tashliq kitablar" ni öginish qatarliq heriketlerni qozghighan idi.

"Qeshqer xewerler tori" tarqatqan xewerge qarighanda, da'iriler mushu ayning 23-küni qeshqer wilayitidiki mu'awin nahiye derijiliktin yuqiri kadirlardin "Üch aq tashliq kitab" boyiche imtihan alghan bolup, imtihan'gha qeshqer wilayitige biwasite qarashliq orunlardiki nahiye, bashqarma derijilik 483 neper kadir hem shundaqla 12 nahiye (sheher) diki nahiye, bashqarma derijilik 652 neper kadir bolup, jem'iy 1200 ge yéqin kishi qatnashqan.

Imtihan'gha kirgen kadirlar "Shinjangning térrorluqqa qarshi turush, esebiylikni tügitish kürishi we kishilik hoquq kapaliti", "Shinjanggha da'ir bir qanche tarixiy mesile" "Shinjangdiki kespiy maharet telim-terbiye xizmiti" din ibaret "Üch aq tashliq kitab" tiki mezmunlargha munasiwetlik 90 minutluq imtihan'gha qatnashqan.

Xewerde töwendikiler bayan qilin'ghan: "Pütün qeshqer wilayitide 'üch aq tashliq kitab' asasiy bilimliridin merkezlik imtihan élishni qanat yaydurushtiki meqset keng partiye ezaliri we kadirlargha shinjangning tarix, millet, medeniyet, din qatarliq mesililirini del jayida tonutush. . . Chégra ichi-sirtidiki düshmen küchlerning tarixni burmilaydighan, heq-naheqni astin-üstün qéliwétidighan xata sepsetisige küchlük reddiye bérish, asasidin tüzep menbedin saplashturup. . . Qudretlik aktip küch tarqitishtin ibaret."

Diqqet qozghaydighini "Shinjanggha nishanliq yardem bérish" dégen tür boyiche kelgen kadirlarmu bu imtihan'gha qatnashturulghan bolup, uningda yene kadirlarning imtihan netijisi "Yil axiridiki bahalashning muhim asasi qilinidu," déyilgen.

Yéqindin buyan ashkariliniwatqan bir qisim xewerlerde, xitay hökümiti Uyghur élide peyda qiliwatqan derijidin tashqiri siyasiy atmosféraning shu jaydiki xitay kadir ammisinimu bizar qiliwatqanliqi melum bolghan. Bezi xitaylar hetta ijtima'iy taratqularda xitay ölkiliridiki xitaylargha xitab qilip: "Shinjanggha kelmeslikni, bolmisa bu yerde tügimes siyasiy yighinlarning tutqunigha aylinidighanliqini" agahlandurghan idi.

Toluq bet