Aqsu wilayitining paxta mehsulatliri ishlepchiqirilidighan mejburiy emgek bazisigha aylandurulghanliqi melum bolmaqta

Amérika hökümiti Uyghur élini menbe qilghan herqandaq paxta mehsulati mejburiy emgekke chétishliq bolghanliqi üchün ularning amérika bazirigha kirishini omumyüzlük chekligenidi. Shundaq bir peytte aqsu axbarat torida élan qilin'ghan bir xewer amérikaning qararining asasi barliqini yene bir qétim ispatlidi.

Xewerde yene munular déyilgen: “. . . Hazir pütün wilayette 4 milyon 590 ming urchuqluq yip égirish, 120 ming métir rext toqush kölimi shekillinip, toqumichiliq, kiyim ـ kéchek ishlepchiqirish boyiche pütün kesip zenjiri asasen shekillendi. Hazirghiche, wilayitimizde en'ge élin'ghan toqumichiliq, kiyim ـ kéchek karxanisidin 481 i bar bolup, buning ichide: yip égirish karxanisi 66, rext toqush karxanisi 28, gül bésish ـ boyash karxanisi bir, a'ile toqumichiliq, kiyim ـ kéchek karxanisi 189, bashqa türdiki karxanilar 197”.

Analizchilar yuqiridiki sanliq melumatlarning aqsu wilayitining mejburiy emgek asasidiki paxta mehsulatliri ishlepchiqirish bazisigha aylandurulghanliqi bilen baghlinishliq uchur ikenlikini otturigha qoymaqta. Xewerde yene, aqsu awat nahiyesining besh'ériq bazirida “Paxta toqumichiliq, yasimichiliq kesip baghchisi” échilghan peqet bir zawuttila yiligha 90 milyon yüenlik ilme toqulma, kiyim ـ kéchek qatarliq mehsulatlar ishlepchiqiridighanliqi we 300 din artuq ademni ishqa orunlashturghili bolidighanliqi bayan qilin'ghan.

Xitaydiki paxta we paxta mehsulatliri sahesining Uyghurlarning mejburiy emgiki eng köp qolliniliwatqan sahe ikenliki tetqiqatchilar teripidin polattek pakitlar bilen ispatlan'ghanidi. Radiyomiz hetta aqsudiki xu'afu toqumichiliq fabrikisining 20 mingdin artuq lagér tutqunini ishqa séliwatqanliqini delillep chiqqan.

Uyghurlarning keng kölemde qul emgekchilirige aylandurulushi küchlük diqqet qozghawatqan bir mesile bolup, amérika we en'gliye qatarliq döletler bu heqte keskin tedbirlerni qollanmaqta. 13-Yanwardin bashlap amérikaning 328 kirish éghizining hemmiside Uyghur mejburiy emgiki asasidiki paxta mehsulatliri we pemidur mehsulatlirigha qarita tutup qélish buyruqi élan qilindi.