Арфийә ери: “уйғурлар гүлләп-яшнашқа һәқлиқ!”

Мухбиримиз әзиз
2023.05.16

2023-Йили апрелда японийә парламентиниң әзалиқиға сайланған уйғур қизи арфийә ери (арфийә абләт) йеқинда “аксйос” (Axios) ториниң мәхсус зияритини қобул қилди. Зиярәт җәрянида арфийә уйғурлар өз юртида қирғинчилиққа вә бастурушларға дуч келиватқанда дуняниң башқа җайлирида уларниң сиясий, иқтисад вә башқа саһәләрдә өзигә чушлуқ утуқ қазиниватқанлиқини алаһидә тәкитлиди.

“аксйос” ториниң 16-майдики хәвиридә ейтилишичә, у бу қетимқи зиярәт җәрянида “биз һазир қирғинчилиқниң қурбани болуватимиз. Әмма бизниң утуқ қазинишқа, шуниңдәк гүлләп-яшнашқа лаяқәтлик бир хәлқ икәнликимизни өз хизмитим арқилиқ намаян қилип бәрсәмкән, дегән үмидтимән” дегән. Гәрчә арфийәниң японийә парламентидики вәзиписи биваситә һалда уйғурлар үчүн хизмәт қилиш болмисиму әмма униң балилар параванлиқи, апәткә тақабил туруш қатарлиқ саһәләрдики биҗанидил хизмәтлири билән уйғурларниңму юқири дәриҗидики сиясий саһәдә мувәппәқийәтлик хизмәт қилалайдиғанлиқини намаян қилғанлиқи муһаҗирәттики уйғурларниң қизғин алқишиға муйәссәр болған.

Арфийә японийәдә туғулуп чоң болған һәмдә японийә сиясий саһәсигә киргән тунҗи уйғур һесаблиниду. Мәлум болушичә, японийәдә тәхминән икки миң әтрапида уйғур яшимақтикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.