Uyghur élida asasiy qatlam kadir-emeldarlirini jazalash herikiti dawam qilmaqta

Muxbirimiz irade
2021-05-06
Share

Uyghur élidiki hökümet tor betliri 6-may künidiki xewiride, atush we chöchektin bolup 6 neper kadir-emeldarning "Merkezning 8 türlük belgilimisi" ge xilapliq qilghanliqini ilgiri sürdi. Mezkur 6 neper emeldarning 2 nepiri Uyghur, 1 nepirining qazaqliqi melum bolmaqta.

Ularning biri atush sheherlik xelq sot mehkimisi délo turghuzush bölümining yardemchi sotchisi jür'et ismayil bolup, xewerde "Jür'et ismayil délo bahalash xizmitini waqtida yaxshi qilmighan, netijide terepler jazagha tartilmay nachar tesir peyda qilghanliqi üchün partiye teripidin qattiq agahlanduruldi," déyilgen.

Yene biri atush shehiri üstün'atush baziri doxturxana shöbisining mudiri yalqun sulayman bolup, da'iriler uni "Hökümetke tewe mashinilarning gaz kartisini bashqurushta qalaymiqanchiliq peyda qilghanliqtin bir qanche bashqurush obéykti hökümetning gaz kartisini qalaymiqan ishlitip gaz qachiliwaldi," dep eyibligen.

Xitay da'iriliri yéqindin buyan Uyghur élida "Merkezning 8 türlük belgilisimige xilapliq qilish" dégen nam bilen asasiy qatlamlardiki kadir-emeldarlarni jazalash herikiti qozghighan. Chet ellerdiki közetchiler xitay hökümiti hazir xelq'arada Uyghurlargha qaritiwatqan irqiy qirghinchiliqi tüpeylidin qattiq tenqid we bésimgha duch kelgenliktin, rayondiki weziyetni yenimu chingitip, kadir-emeldarlarning yürikini qisishni meqset qiliwatqanliqini mölcherlimekte.

Xitayche "Tengritagh" tori yéqinda élan qilghan bir xewiride 2021-yilining birinchi peslidila Uyghur élidiki intizam tekshürüsh we nazaret qilish organliri teripidin jazalan'ghan asasiy qatlam kadir-emeldarlirining 4556 neper, tenqidlep terbiyelen'genlerning16226 neperlikini élan qilghan. Bular ichide Uyghurlarning qanchilik sanni teshkil qilidighanliqi éniq déyilmigen bolsimu, biraq hökümet taratqulirida isimliri ashkarilan'ghan isimlardin bularning tengdin tolisining Uyghur millitidin ikenlikini perez qilish mumkin iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet