"атлантик" журнили: "хитай дегән бир қәғәз йолвас"

Мухбиримиз җәвлан
2021-05-05
Share

Хитайниң зади қанчилик күчи бар? хитайға тақабил туруш үчүн униң күчини қандақ мөлчәрләш керәк? "атлантик" журнилида елан қилинған бир мақалидә бу нуқтилар тәһлил қилинған болуп, мақалидә аптор америка президенти җов байденниң тунҗи қетимлиқ дөләт мәҗлиси бирләшмә йиғинида хитайни 4 қетим тилға алғанлиқини, әмма һәр бир җүмлә сөзидин хитайниң тәсирини һес қилғили болидиғанлиқини, буниңдин җов байденниң хитайни риқабәтчи дөләт дәп қарап, бу риқабәттә утуп чиқишни өзиниң президинтлиқ һаятидики чоң синақ дәп қарайдиғанлиқини оттуриға қойған.

Арқидинла аптор йәнә 2018-йил нәшр қилинған "америка немә үчүн йәнила дунядики бирдинбир дәриҗидин ташқири дөләт?" дегән китабтики көз қарашни нәқил кәлтүрүп, хитайниң иқтисад, пул-муамилә, техника вә һәрбий күчигә аит статистикилиқ мәлуматларниң тоғра әмәслики вә көптүрүветилгәнликини, "хитай америкадин ешип кетиду" дегән қарашниң тоғра әмәсликини вә бу қарашниң америкини хата һөкүм, хата сиясәткә башлайдиғанлиқини оттуриға қойған.

Апторниң қаришичә, әгәр дөләт ички ишләпчиқириш омумий қиммити (GDP) ни дәйдиған болса, хитай 19-әсирдила дуня бойичә әң күчлүк дөләт һесаблинатти. Әмма GDP пәқәт саннила көрситиду, сүпәтни көрсәтмәйду. Хитайниң GDP санлиқ мәлумати һазирму юқири, әмма униң ичи бош. Хитайниң маарипи, техникиси вә һәрбий күчи йәнила америкаға йетәлмәйду. Хитай карханилириниң тәтқиқат үчүн аҗратқан мәблиғи уларниң киримигә баққанда наһайити төвән. Хитай тәқлид қилип ясашта дуняда биринчи болсиму, һалқилиқ техника йәнила америкиниң қолида. Хитай америкаға иқтисад вә тәрәққият җәһәттин йетишивелиши мумкин, әмма буниң унчә оңушлуқ болуп кетиши натайин. Хитайниң түзүлмисидә еғир мәсилиләр мәвҗут, пуқралирини бастуруш чиқимлири ғайәт зор салмақни игиләйду. Хитайниң һәрбий чиқимлири асасән коммунистик һакимийәтни қоғдаш үчүн сәрп қилиниду, американиң болса ташқи дүшмәнгә тақабил туруш үчүн ишлитилиду. Хитайниң деңиз йоллири униң рәқиблири билән қоршалған, у яқтин русийәму халиған чағда хитайға дүшмән болалайду. Қисқиси хитайниң күчини бәк юқири мөлчәрләп, униңға хата һөкүм қилип, хата тәдбир түзмәслик керәк.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт