Атушта 5.2 Бал йәр тәвригән

Вашингтондин мухбиримиз әркин тәйярлиди
2024.05.20

20-Май күни саәт бир әтрапида, атушниң йеза-кәнтләр мәркәзләшкән районида 5.2 Бал йәр тәвригән. Хитай таратқулириниң хәвәрлиридин мәлум болушичә, йәр тәврәш мәркизиниң әтрапидики 10 километир даирә ичигә уйғурлар зич олтурақлашқан нурғун йеза-кәнтләр җайлашқан икән.

Шинхуа агентлиқи қатарлиқ хитай һөкүмәт таратқулириниң йәр тәврәштин икки саәт кейин бәргән хәвәрлиридә, һазирғичә тәврәштин келип чиққан бузғунчилиқ, ярилиниш вә  өлүм-йетим һадисилириниң йүз бәрмигәнлики билдүрүлгән. Нөвәттә, йәр тәврәшниң тәсири қәшқәр қатарлиқ қошна районларда интайин күчлүк рәвиштә һес қилинғанлиқи, қәшқәр шәһиридики аһалиләрниң “йәр тәвригәндә силкинишниң интайин шиддәтлик болғанлиқи вә бир қанчә секунт давамлашқанлиқи” ни билдүргәнлики қәйт қилинмақта.

Атуш шәһиридә йүз бәргән бу қетимқи йәр тәврәш, бу йил 1-айда ақсуниң учтурпан наһийәси вә қизилсу областиниң ақчи, улуғчат қатарлиқ наһийәлиридә йүз бәргән 7.1 Бал йәр тәврәштин кейин, мәзкур районда йүз бәргән әң қаттиқ йәр тәврәшләрниң бири һесаблиниду. Учтурпан вә улуғчаттики йәр тәврәш 7.1 Бал болсиму, әмма хитай һөкүмити йәр тәврәштә 3 адәмниң өлгәнлики, 5 адәмниң яриланғанлиқи билдүргән иди. Даириләр алдинқи қетим йәр тәврәшниң һәқиқий бузғунчилиқ дәриҗиси вә көлимигә даир учурларни қаттиқ контрол қилип, торда буниңға даир учур тарқатқан кишиләрни тутқун қилған болсиму, әмма вәқәдин хәвәрдар кишиләр учтурпанниң имамлирим қатарлиқ йезилириниң бузғунчилиққа учриғанлиқини илгири сүргән иди.

Хитай йәр тәврәш понкити ториниң хәвиридә ейтилишичә, йәр тәврәш мәркизиниң 10 километир даириси ичидә шеһит кәнти, ачибулақ, мәшһәт қатарлиқ нурғун йеза-кәнтләр җайлашқан икән. Хитай һөкүмәт таратқулириниң хәвәрлиридә йәр тәврәш мәркизиниң атуш шәһиригә 98 километир, қәшқәр шәһиригә 128 километир келидиғанлиқи, нөвәттә йәр тәврәш районида 13 аптомобил, 50 кишидин тәшкил тапқан икки алдин қутқузуш әтрити әвәтилгәнлики қәйт қилинмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.