Atushta 5.2 Bal yer tewrigen

20-May küni sa'et bir etrapida, atushning yéza-kentler merkezleshken rayonida 5.2 Bal yer tewrigen. Xitay taratqulirining xewerliridin melum bolushiche, yer tewresh merkizining etrapidiki 10 kilométir da'ire ichige Uyghurlar zich olturaqlashqan nurghun yéza-kentler jaylashqan iken.

Shinxu'a agéntliqi qatarliq xitay hökümet taratqulirining yer tewreshtin ikki sa'et kéyin bergen xewerliride, hazirghiche tewreshtin kélip chiqqan buzghunchiliq, yarilinish we  ölüm-yétim hadisilirining yüz bermigenliki bildürülgen. Nöwette, yer tewreshning tesiri qeshqer qatarliq qoshna rayonlarda intayin küchlük rewishte hés qilin'ghanliqi, qeshqer shehiridiki ahalilerning “Yer tewrigende silkinishning intayin shiddetlik bolghanliqi we bir qanche sékunt dawamlashqanliqi” ni bildürgenliki qeyt qilinmaqta.

Atush shehiride yüz bergen bu qétimqi yer tewresh, bu yil 1-ayda aqsuning uchturpan nahiyesi we qizilsu oblastining aqchi, ulughchat qatarliq nahiyeliride yüz bergen 7.1 Bal yer tewreshtin kéyin, mezkur rayonda yüz bergen eng qattiq yer tewreshlerning biri hésablinidu. Uchturpan we ulughchattiki yer tewresh 7.1 Bal bolsimu, emma xitay hökümiti yer tewreshte 3 ademning ölgenliki, 5 ademning yarilan'ghanliqi bildürgen idi. Da'iriler aldinqi qétim yer tewreshning heqiqiy buzghunchiliq derijisi we kölimige da'ir uchurlarni qattiq kontrol qilip, torda buninggha da'ir uchur tarqatqan kishilerni tutqun qilghan bolsimu, emma weqedin xewerdar kishiler uchturpanning imamlirim qatarliq yézilirining buzghunchiliqqa uchrighanliqini ilgiri sürgen idi.

Xitay yer tewresh ponkiti torining xewiride éytilishiche, yer tewresh merkizining 10 kilométir da'irisi ichide shéhit kenti, achibulaq, meshhet qatarliq nurghun yéza-kentler jaylashqan iken. Xitay hökümet taratqulirining xewerliride yer tewresh merkizining atush shehirige 98 kilométir, qeshqer shehirige 128 kilométir kélidighanliqi, nöwette yer tewresh rayonida 13 aptomobil, 50 kishidin teshkil tapqan ikki aldin qutquzush etriti ewetilgenliki qeyt qilinmaqta.