Америка авам палата әзаси вакистон авам палатасиниң гуваһлиқ йиғинида уйғур мәсилисини оттуриға қойди

Мухбиримиз әркин
2019-05-17
Елхәт
Пикир
Share
Принт

Америка авам палатаси әзаси җеннифер вакистон америка авам палатасида өткүзүлгән бир қетимлиқ гуваһлиқ йиғинида уйғур мәсилисини оттуриға қоюп, уйғурларниң вәзийитиниң интайин җиддийлики, буниңға қарита американиң тәдбир қоллиниши керәкликини тәкитлигән.

Американиң уйғурлар әң көп олтурушлуқ виргинийә штатидин болған мәзкур демократик авам палата әзаси бу сөзләрни 15‏-май күни чақирилған авам палата малийә комитетиниң гуваһлиқ бериш йиғинида қилған.

Мәзкур гуваһлиқ йиғинида мутәхәссисләр америка дөләт бихәтәрлик вә ташқи сиясити дуч келиватқан хирисларға қарита ембарго қоюш мәсилиси һәққидә пикир билдүргән. Җеннифер вакистон сөзидә, хитай һөкүмитиниң системилиқ бастуруш һәрикити елип берип, уйғур хәлқиниң диний етиқади вә етник мәвҗутлуқини йоқитишқа урунуватқанлиқи, америка дөләт мудапиә министирлиқиниң бир милйондин 3 милйонғичә уйғурниң лагерларда тутуп туруватқанлиқи вә бу орунларни җаза лагерлири, дәп тәриплигәнликини әскәртип, «магнитиский қануни бейҗиңниң бу мәсилидики хаһишини өзгәртишкә бесим ишлитиштә үнүмлүк рол ойнамду?» дәп сориған. Униң соалиға қарита атлантик кеңиши йәр шари енергийә мәркизиниң тәтқиқатчиси дәйвид мортлок, һөкүмәтниң йеңи ембарго тизимликиниң бу йил 6‏-айда вә 12-айда елан қилинидиғанлиқини билдүрүп, «уйғурлар дуч келиватқан муамилә һәққидики қорқунчлуқ хәвәрләр вә униң көлимини нәзәрдә тутқанда әлвәттә у магнитиский қануниниң күчлүк намзатидәк қилиду. Бу, хитайға вә уни қоллаватқан карханиларға интайин күчлүк сигнал бериду» дегән.

Җеннифер вакистон шу күни тветирға йоллиған учурида, американиң хитайниң қорқунчлуқ кишилик һоқуқ дәпсәндичиликигә инкас қайтуруш мәсулийити барлиқини тәкитләп, «биз пәқәт қуруқ чақириқ билән чәклинип қалмаслиқимиз, һәрикәт қоллинишимиз керәк» дегән. Лекин американиң ярдәмчи ташқи ишлар министири скот бусбйниң йеқинда радийомизға билдүрүшичә, «иқтисадий җаза қоюш мәсилиси мурәккәп бир мәсилә болуп, җаза тәдбирлирини иҗра қилишқа мувапиқ қануний асас бар-йоқлуқини муәййәнләштүрүшкә вақит кетидикән»

Пикирләр (0)
Share
Толуқ бәт