Amérika awam palata ezasi wakiston awam palatasining guwahliq yighinida Uyghur mesilisini otturigha qoydi

Muxbirimiz erkin
2019-05-17
Élxet
Pikir
Share
Print

Amérika awam palatasi ezasi jénnifér wakiston amérika awam palatasida ötküzülgen bir qétimliq guwahliq yighinida Uyghur mesilisini otturigha qoyup, Uyghurlarning weziyitining intayin jiddiyliki, buninggha qarita amérikaning tedbir qollinishi kéreklikini tekitligen.

Amérikaning Uyghurlar eng köp olturushluq wirginiye shtatidin bolghan mezkur démokratik awam palata ezasi bu sözlerni 15‏-may küni chaqirilghan awam palata maliye komitétining guwahliq bérish yighinida qilghan.

Mezkur guwahliq yighinida mutexessisler amérika dölet bixeterlik we tashqi siyasiti duch kéliwatqan xirislargha qarita émbargo qoyush mesilisi heqqide pikir bildürgen. Jénnifér wakiston sözide, xitay hökümitining sistémiliq basturush herikiti élip bérip, Uyghur xelqining diniy étiqadi we étnik mewjutluqini yoqitishqa urunuwatqanliqi, amérika dölet mudapi'e ministirliqining bir milyondin 3 milyon'ghiche Uyghurning lagérlarda tutup turuwatqanliqi we bu orunlarni jaza lagérliri, dep teripligenlikini eskertip, "Magnitiskiy qanuni béyjingning bu mesilidiki xahishini özgertishke bésim ishlitishte ünümlük rol oynamdu?" dep sorighan. Uning so'aligha qarita atlantik kéngishi yer shari énérgiye merkizining tetqiqatchisi deywid mortlok, hökümetning yéngi émbargo tizimlikining bu yil 6‏-ayda we 12-ayda élan qilinidighanliqini bildürüp, "Uyghurlar duch kéliwatqan mu'amile heqqidiki qorqunchluq xewerler we uning kölimini nezerde tutqanda elwette u magnitiskiy qanunining küchlük namzatidek qilidu. Bu, xitaygha we uni qollawatqan karxanilargha intayin küchlük signal béridu" dégen.

Jénnifér wakiston shu küni twétirgha yollighan uchurida, amérikaning xitayning qorqunchluq kishilik hoquq depsendichilikige inkas qayturush mes'uliyiti barliqini tekitlep, "Biz peqet quruq chaqiriq bilen cheklinip qalmasliqimiz, heriket qollinishimiz kérek" dégen. Lékin amérikaning yardemchi tashqi ishlar ministiri skot busbyning yéqinda radiyomizgha bildürüshiche, "Iqtisadiy jaza qoyush mesilisi murekkep bir mesile bolup, jaza tedbirlirini ijra qilishqa muwapiq qanuniy asas bar-yoqluqini mu'eyyenleshtürüshke waqit kétidiken"

Toluq bet