ئامېرىكا ئاۋام پالاتاسىنىڭ مۇئاۋىن رەئىسى كېۋىن ماككارتىي ئامېرىكا شىركەتلىرىنى ئۇيغۇر مەجبۇرىي ئەمگىكىدىن ئۇزاق تۇرۇشقا چاقىردى

مۇخبىرىمىز ئىرادە
2021-06-17
Share

خىتاينىڭ ئۇيغۇرلارغا قارىتىۋاتقان مەجبۇرىي ئەمگىكىنى ئاياقلاشتۇرۇش ۋە ئامېرىكا شىركەتلىرىنىڭ بۇ مەجبۇرىي ئەمگەكتىن پايدا ئېلىشىنىڭ ئالدىنى ئېلىش ئۈچۈن ئاكتىپ ھەرىكەت قىلىپ كېلىۋاتقان ئامېرىكا ئاۋام پالاتاسىنىڭ جۇمھۇرىيەتچى مۇئاۋىن رەئىسى كېۋىن ماككارتىي خىتايدىكى مەجبۇرىي ئەمگەكتىن پايدا ئېلىۋاتقان ئامېرىكا شىركەتلىرىنى جازالاش ئۈچۈن بۇ ھەقتىكى مۇناسىۋەتلىك قانۇنغا ئۆزگەرتىش كىرگۈزۈش لايىھەسىنى سۇنغان.

16-ئىيۇن كۈنى كېۋىن ماككارتىي بۇ ھەقتىكى باياناتىدا مۇنداق دېگەن:

«نۇرغۇن مەھسۇلاتلارنىڭ خىتايدا ئىشلەپچىقىرىلىدىغانلىقى سىر ئەمەس، شۇنداقلا خىتاي كومپارتىيەسىنىڭ ئۇيغۇرلارنى مەجبۇرىي ئەمگەك سالىدىغانلىقىمۇ سىر ئەمەس. ئامېرىكالىقلار ئەركىنلىك ئۈچۈن كۈرەش قىلغۇچىلار بولۇش سۈپىتى بىلەن قۇل ئەمگىكىگە كۆز يۇمسا بولمايدۇ.»

ئۇ يەنە مۇنداق دېگەن: «ھېچقانداق ئامېرىكا شىركىتى خىتايدا ياكى باشقا جايلاردا مەجبۇرىي ئەمگەككە تايىنىدىغان مەھسۇلات ياكى مۇلازىمەتلەرگە چېتىلىپ قالماسلىقى كېرەك، بىز جۇمھۇرىيەتچىلەر نېگىزلىك كىشىلىك ھوقۇق سىنىقىدىن ئۆتەلمىگەن بۇ شىركەتلەرگە جازا يۈرگۈزۈش ئۈچۈن ھەرىكەتكە ئۆتۈپ بۇ لايىھەنى ئوتتۇرىغا قويدۇق.»

كېۋىن ماككارتىي يەنە ئامېرىكانىڭ خىتايدا ئۇيغۇرلارغا قارىتىلىۋاتقان مەجبۇرىي ئەمگەكنى ئاياقلاشتۇرۇش، ئامېرىكا شىركەتلىرىنىڭ بۇنىڭدىن مەنپەئەتلىنىشىنىڭ ئالدىنى ئېلىش ئۈچۈن ئەمەلىي تەدبىرلەرنى قوللىنىشى كېرەكلىكىنى ئەسكەرتكەن.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت