Awstraliye xitaygha taqabil turush iqtidarini ashurush üchün herbiy kölimini zoraytidiken

Awstraliye bash ministiri skot morrison we dölet mudapi'e ministiri pétér dutton 9-mart küni awstraliyening herbiy kölimini zoraytidighanliqini jakarlighan.

“Wal-sitrit zhurnili” ning xewiridin qarighanda, awstraliye özining muqim armiyesining kölimini %30 ashurup, formiliq muqim eskiriy xadimini 80 minggha yetküzidiken. Bu amérikaning ittipaqdishi bolghan awstraliyening hindi-tinch okyan rayonida xitay tehditi keskinlishiwatqan mezgilde öz mudapi'esini kücheytish üchün alghan eng yéngi qedimi iken.

Awstraliye kelgüsi 20 yilda tedrijiy élip bérilidighan herbiy sélinmidiki éshish arqiliq awstraliyening déngiz, quruqluq, hawa we tor bixeterliki sahesige qaritidiken.

Awstraliye bash ministiri skot morrison axbarat élan qilish yighinida “Biz awstraliyeni qoghdash üchün yuqiri téxnikiliq meshghulatlarni qilalaydighan téximu köp esker, matros we uchquchilargha mohtaj” dégen.

Dölet mudapi'e ministiri pétér dutton: “San we tejribining éshishi bizning yadro énérgiyelik su asti paraxoti, paraxot, ayropilan we ilghar qorallarni tereqqiy qildurushimizning kapaliti. Bu bizning alem boshluqi, uchur we tor saheside urush qilish iqtidari shekillendüreleydighanliqimizdin dérek béridu” dégen.

Bu yil 2-ayda awstraliye, amérika, yaponiye we hindistan qatarliq 4 dölet guruhi yighin échip, hindi-tinch okyan rayonini zorawanliqtin xaliy qilish üchün hemkarliqni chongqurlashturush, jümlidin xitayning rayondiki herbiy kéngeymichilik heriketlirige taqabil turushni wede qilishqanidi.

En'gliyemu awstraliye bilen tüzülgen kélishimning bir qismi süpitide hindi-tinch okyanning bixeterlikini kücheytish üchün 25 milyon fond-stérling (34 milyon dollar) meblegh sélishqa wede bergen.