"Awstraliye musulmanlar waqti tori" musulmanlarni xitayning Uyghurlarni basturushigha qarshi turushqa chaqirdi

Muxbirimiz erkin
2018-07-06
Élxet
Pikir
Share
Print

4‏-Iyul küni "Awstraliye musulmanlar waqti tori" da élan qilin'ghan bir obzorda musulmanlarni xitayning Uyghurlarni keng kölemlik basturushi, "Yighiwélish lagérliri" gha solishi hemde ularning diniy étiqadi, medeniyiti, örp-adetlirini yoqitishigha qarshi turushqa chaqirdi.

Aptor dawut batlér "Xitay musulmanlar dunyasining xalis niyitige buzghunchiliq qilmaqta" serlewhilik maqaliside Uyghur diyaridiki musulmanlarning normal islamiy ibaditi cheklinip, bu rayonning saqchi dölitige aylandurup qoyulghanliqi, shi jinpingning musulmanlarni islamsizlashturush siyasiti ularni kompartiyenila medhileydighan "Shatutilar" dek ehwalgha chüshürüp qoyghanliqini tekitligen. U yene bir milyon Uyghurning "Yighiwélish lagérliri" gha qamilip, méngisi yuyuliwatqanliqi, "Shuning bilen bir waqitta yerlik bayliqlarni xenzularning ilikidiki xitay hökümitining changgiligha éliwalghanliqi" ni tekitligen.

U maqaliside Uyghurlarni xalighanche tutqun qilish, qanunsiz öltürüsh, keng kölemlik "Yighiwélish lagérliri" gha solash, Uyghur tilini cheklesh, diniy zatlarni türmige tashlash yaki öltürüsh, gheyriy musulmanlarni musulmanlarning öyige mejburiy orunlashturush, iqtisadi jehettin chetke qéqish we xitaylashturushtek bu qilmishlarning ottura esirdiki ispaniyege oxshap qalghanliqini ilgiri sürgen.

Uning qarishiche, musulmanlar we musulman hökümetler xitay özining siyasitini özgertmigiche xitayning musulmanlar zéminidiki tesirini cheklishi kérek iken. U dunya islam hemkarliq teshkilatining zörür tedbirlerni élishi, xitay karxanilirining ul esliheler qurulushlirigha qatnishishini cheklishi, yuqiri derijilik diplomatik tedbirlerni ishlitip, xitayning siyasitining qobul qilinmaydighanliqini ipadilishi, uning b d t kishilik hoquq kéngishini suyi'istémal qiliwatqanliqini ashkarilishi kéreklikini ilgiri sürgen.

Gherbtiki bezi döletler her nöwetlik b d t yighinlirida we yilliq kishilik hoquq doklatlirida xitayning Uyghurlargha qaratqan siyasitini tenqid qilsimu, lékin islam döletlirining buninggha tiwish chaqarmasliqi, bezi islam döletlirining b d t yighinlirida xitayni qollishi Uyghurlarning qatttiq naraziliqini qozghap kelgen idi.

Toluq bet