Австралийә парламент әзаси лиса сиң парламентта уйғур мәсилисини оттуриға қойди

Мухбиримиз шөһрәт һошур
2018-08-22
Share

Авсралийә кеңәш палатасиниң әзаси, ишчилар партийәсиниң вәкили лиса мария сиң түнүгүн, йәни 21‏-авғуст күни австралийә парламентида қилған сөзидә уйғур мәсилисини мәхсус тилға елип өткән.

У сөзидә уйғурларниң узақ вә шанлиқ бир тарихқа игә бир милләт икәнлики, уйғур аптоном районида икки йилдин буян мисли көрүлмигән бир инсан һәқлири дәпсәндичилики йүз бериватқанлиқини баян қилған.

Б д т ирқи айримичилиқни түгитиш комитетиниң доклатидин нәқилләр кәлтүргән лиса ханим уйғур аптоном районида нөвәттә 2 милйонға йеқин кишиниң “қайта тәрбийә” лагерлирида солинип йетиватқанлиқини оттуриға қойған. Уйғур инсан һәқлири вәзийитиниң һәрқайси саһәлиридин мисаллар кәлтүргән лиса ханим хитайниң бу дәпсәндичиликни аталмиш “диний ашқунлуққа қарши туруш” вә “муқимлиқни сақлаш” нами астида елип бериватқанлиқини илгири сүргән.

Лиса ханим бу сөзләрни түнүгүн австралийә парламентида камбоджа вәзийити һәққидә бәргән баянатиниң давамиға қистуруп өткән. У сөзиниң ахирида камбоджадики вә уйғур аптоном районидики инсан һәқлири мәсилисиниң чоқум һәл қилиниши керәкликини, буниңға демократик бир дөләт болған австралийәниң чоқум арилишиши керәкликини тәкитлигән.

Алдинқи һәптә австралийә парламентиниң торида австралийәдики уйғурларниң имзалиқ тәләпнамә паалийити башланған. Мәзкур тәләпнамидә австралийә һөкүмитиниң уйғур райондики йиғивелиш лагерлирини тақаш һәққидә хитайға бесим ишлитиши тәләп қилинған иди. Австралийә шәрқи түркистан җәмийитиниң йетәкчиликидә башланған мәзкур паалийәт һелиһәм давам қилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт