"Sidnéy etigenlik xewerchisi" ning maqalisi: "Tehdit astidiki Uyghur muzikisi awstraliyede yéngi hayatliqqa érishti"

Muxbirimiz erkin
2018-09-03
Élxet
Pikir
Share
Print

Uyghur sen'etchiler 2-séntebir awstraliyening sidnéy shehiride ötküzülgen "Sédniy diniy muzikilar féstiwali" da Uyghur on ikki muqamini orundap, awstraliyelik tamashibinlarning diqqitini qozghidi. Sidnéy shehiridiki riwérsayid tiyatirxanisida ötküzülgen bu féstiwalda awstraliyediki tonulghan Uyghur muzikant shöhret tursun bilen dangliq dapchi tahir imin rak muqamini orundighan.

Bu Uyghur klassik muzikisi "On ikki muqam" ning "Sidnéy diniy muzikilar féstiwali" dek bir chong sehnide tunji qétim orundilishidur. Bu qétim sehnide rak muqamini orundashqa yene yipek yoli muzikantliridin tashqi monggholiyelik muzikant buxchulun, awstraliyelik muzikant, awstraliye dölet uniwérsitétining muzika léktori kim kyuno qatarliqlarmu ishtirak qilghan.

Awstraliyediki "Sidnéy etigenlik xewerchisi" géziti Uyghurlarning on ikki muqami heqqidiki bir xewiride "Tehdit astidiki Uyghur muzikisining awstraliyede yéngi hayatliqqa érishkenliki" ni bildürgen. Uyghur rak muqami xitay hökümiti nöwette Uyghur klassik edebiyat -sen'etni "Esebiylik" we "Bölgünchilik" xahishi küchlük dégen bahanida cheklep, bu sahediki nurghun muzikantlar, naxshichi we sen'et tetqiqatchilirini qamaq jazasigha höküm qilghan yaki yighiwélish lagérlirigha qamawatqan bir mezgilde "Sidnéy diniy muzikilar féstiwali" gha qatnashturulghan idi.

Chet'el mutexessislirining ilgiri sürüshiche, Uyghurlarning klassik edebiyat-sen'iti din bilen zich munasiwetlik bolghachqa nöwette xitayning Uyghur aptonom rayonida élip bériwatqan atalmish "Ashqunluq" ni tazilash herikitining zerbe bérish nishanigha aylinip qalghan. "Sidnéy diniy muzikilar féstiwali" ning sen'et yétekchisi richard pitkuwich "Sidnéy etigenlik xewerchisi" gézitining muxbirigha qilghan sözide bu féstiwalda muqamning awstraliyelik tamashibinlarning Uyghur medeniyitini chongqur chüshinishige türtke bolushini ümid qilidighanliqini bildürüp, "Men bir awstraliyelik tamashibin bolush süpitide muqamning heqiqiy zoqini hés qildim," dégen.

Toluq bet