Awstraliye xitaydin kélidighan ishlemchilerge wiza bérishni toxtatqan

Awstraliye hökümiti xitaydin kélip, awstraliyede melum muddet ishleydighanlarning xizmet wizisini toxtitip qoyghan. Mezkur hökümetning bildürüshiche, kéler yildin bashlap awstraliyede qurulushta ishleydighan ishchilar xitay, wiyétnam we hindistan ishchiliri arisidin latariye arqiliq tallinidiken.

“Jenubiy xitay etigenlik pochtisi” gézitining 15-may küni bu heqte bergen xewiride éytilishiche, awstraliye hökümiti xitay puqralirigha qaratqan xizmet wizisini pütünley toxtatqan bolup, 2024-yilning axirida qayta wiza bérishi mumkin iken. 2025-Yil 6-aydin bashlap, xitay, hindistan, wiyétnam puqraliri xizmet wizisigha érishish üchün riqabetke chüshüp, latariye arqiliq wizigha érisheleydiken.

Awstraliyening waqitliq xizmet wizisi 18 yashtin 30 yashqiche bolghanlargha qaritilghan bolup, bu wizini alalighanlar awstraliyeni melum mezgil ziyaret qilalaydiken hem ish tépip ishliyeleydiken. Bu wizining waqti 12 ay bolup, bezi ehwalda uni bir yildin üch yilghiche uzartishqa bolidiken.

Awstraliye bilen xitayning erkin soda kélishimige asasen, awstraliye her yil 5000 xitay puqrasigha waqitliq xizmet wizisi béridiken. Xitaydiki iqtisadning chöküshi, ishsizliqning ewj élishi awstraliye hökümitinimu derhal tedbir élishqa mejbur qiliwatqan bolup, awstraliye hökümiti yene yéngiche wiza bérish usulliri bilen xitaydin mahir ishchi we ustilarni, téxnik xadimlarni qobul qilghan؛ emma meblegh sélish usuli bilen awstraliyege köchmen bolghan xitaylarni azlatqan.

Xewerde qeyt qilinishiche, awstraliye hökümiti bu döletning qurulushigha töhpe qoshalaydighan alahide qabiliyetlik ishchilargha wiza bérishning konkrét pilanini tüzgen. Buninggha parallél halda, 2024-yilning axirida meblegh sélish shekli bilen awstraliye puqrasi bolidighanlargha wiza bérishni toxtitidighanliqini bildürgen.