Хитай баш министири ли чяң австралийәни зиярәт қилидикән

Вашингтондин мухбиримиз әзиз тәйярлиди
2024.06.11

“блумберг хәвәрлири” ниң 11-июндики хәвиридә ейтилишичә, хитай баш министири ли чяң 15-июндин башлап австралийәдә төт күнлүк хизмәт зияритидә болидикән. Буниң билән у өткән йәттә йил ичидә австралийәни зиярәт қилған әң юқири дәриҗилик хитай әмәлдари болуп қалидикән.

“японийә вақти” гезитиниң бу һәқтики обзорида ейтилишичә, австралийә-хитай мунасивити өткән йәттә йилда изчил яманлишип маңған. Болупму австралийәниң сабиқ баш министири скот моррисон (Scott Morrison) “биз таҗсиман вирусиниң мәнбәсини мустәқил йосунда тәкшүрүшни тәләп қилимиз” дегәндин кейин, хитай һөкүмити австралийәдин һарақ, арпа вә кала гөши импорт қилишни мәни қилған. Буниң билән австралийә үчүн һәр йили 13 милярд америка доллирилиқ зиян көрүлгән. Әмма 2022-йили майда солға майил әмгәк партийәси һакимийәт бешиға чиққандин кейин, хитай билән болған мунасивәтни юмшитиш тиришчанлиқи зор дәриҗидә алға сүрүлгән вә импорт чәклимиси бикар қилинған. Австралийә баш министири антони албанизи (Anthony Albanese) бу һәқтә сөз қилип, “хитай баш министири ли чяңни қарши алимиз. Бу қетимлиқ зиярәт арқилиқ биз икки тәрәп оттурисидики иқтисадий мунасивәтни техиму күчәйтишни арзу қилимиз” дегән.

Бирләшмә агентлиқниң бу һәқтики хәвиридә ейтилишичә, ли чяң бу қетим йәнә йеңи зеландийә вә малайсиядиму зиярәттә болидиған болуп, бу маһийәттә антони албанизиниң 2023-йили өктәбирдики хитай зияритигә җавабән қилинған зиярәт һесаблинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.