Awstraliye xitayning tinch okyan döletliridiki kéreksiz qurulushlirini tenqid qildi

Muxbirimiz shöhret hoshur
2018.01.10
Share on WhatsApp
Share on WhatsApp

Awstraliyening xelq'ara tereqqiyat ministiri konsétta wéls xanim xitayning tinch okyandiki aral döletlirige séliwatqan kéreksiz qurulushlirini tenqid qildi.

Özining mikronéziye, fiji, ton'ga qatarliq aral döletlirige 24 qétimdin artuq ziyaret élip barghanliqi we bu jeryanda xitay teripidin sélin'ghan, emma toluq ishlitilmigen köp sandiki qurulushlarni körgenlikini tilgha alghan ministir konsétta wéls xanim, xitayning bu bir yürüsh paydisiz qurulushlarni peqetla öz tesirini kéngeytish üchün salghanliqini, bu qurulushlarning mezkur döletlerning ahalilirige qarita emili bolghan paydilinish qimmitining yoqluqini ilgiri sürgen.

Ministir konsétta xanim xitayning bu yardimini epsanilerdiki padishahlarning “Aq pil” hediyesige, yeni paydilan'ghili bolmaydighan, eksiche putlikashang bolidighan bir hediyege oxshatqan. Xitay tashqi ishlar ministirliqining bayanatchisi lü kang bügün muxbirlarning bu heqtiki so'aligha jawaben, mezkur qurulushlarning tinch okyan aral döletliri xelqlirining jénigha esqétiwatqanliqini we bu qurulushlarning shu dölet hökümetlirining alqishigha érishkenlikini bayan qilghan. 

Firansiye axbarat agéntliqining bügünki bu heqtiki xewiride bayan qilinishiche, xitayning tinch okyan rayonida öz tesirini kücheytish urunushliri yéqidin buyan awstraliye da'irilirini segekleshtürgen. Aldinqi ayda awstraliye bash ministiri chet döletlerning awstraliye siyasitige jasuslar arqiliq qol tiqishining aldini élish heqqide qanun maqullashni otturigha qoyghan bolsa, awstraliye emgek partiyesining ezasi sam dastyari xitay shirkiti bilen hemkarliqi seweblik awstraliye parlaméntidiki wezipisidin istépa bérishke mejbur bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.