Awstraliye taratquliri: "Awstraliyede olturushluq az dégende 10 neper Uyghur xitayda ghayib boldi"

Muxbirimiz eziz
2019-01-11
Élxet
Pikir
Share
Print

Awstraliyening SBS téléwiziye qanili Uyghurlar heqqide xewer bérip, nöwette awstraliyede turush yéshil kartisi alghan az dégende 10 neper Uyghurning xitayda iz-déreksiz ghayib bolghanliqini bildürgen.

Közetküchiler bu kishilerning Uyghur rayonidiki yighiwélish lagérlirigha qamalghanliqini ilgiri sürmekte. SBS Ning xewiride, béyjing da'irilirining bu lagérlarni kishilerge qanun we xitay tili ögitip, radikalliqni tügitidighan "Kespiy terbiyilesh merkezliri" dep ataydighanliqi ilgiri sürülgen.

Xewerde ashkarilinishiche, buningdin 13 yil burun awstraliyege kélip sidnéy shehiride olturaqliship qalghan Uyghur ayal zulpiye hiwillaning singlisi bilen singlisining yoldishi ötken yili xitaygha tughqan yoqlashqa kétip, iz -déreksiz ghayib bolghan. U SBS téldéwiziye qaniligha bergen uchurida, singlisi bilen singlisining yoldishining 2017‏-yili 2‏-ayda yurtigha qaytip barghanda xitay hökümiti teripidin her ikkisining pasportining tartiwélin'ghanliqini bildürgen. Uning bildürüshiche, u qéyin inisining yighiwélish lagérigha élip kétilgenlikige ishinidiken. U, singlisining oghli bilen qizining awstraliyede qalghanliqini bildürüp, "Ularning buninggha bek achchiqi keldi hem heyran qildi. Balilar bek yighlaydu, ular bek bésimda qaldi"dégen. SBS Ning xewiride qeyt qilinishiche, awstraliye tashqi ishlar ministirliqi awstraliyening yéshil kartisigha ige qanche Uyghurning Uyghur rayonida tutqun qilin'ghanliqini bilmeydiken.

Awstraliye tashqi ishlar ministirliqi bayanatchisi mezkur téléwiziye qaniligha bergen bayanatida,"Awstraliye shinjangda awstraliyede turushluq guwahnamige ige qanche Uyghurning tutqun qilin'ghanliqini éniqlashqa imkansiz qaldi" dégen. Lékin awstraliye dölet uniwérsitétining xitayshunas mutexessisi maykél klarkning qarishiche, bundaq Uyghurlar az dégende 10 gha yétidiken. U, "Epsuski, biz konkrét sanni bilmeymiz, biraq méning Uyghur jama'etliri bilen bolghan alaqemdin bundaq délolardin az dégende 10 ni bar, dep éytalaymen" dégen. Awstraliye tashqi ishlar ministirliqining shimaliy asiya ishlirigha mes'ul yuqiriqi derijilik emeldari graham fléchir ötken yili 10‏-ayda awstraliye kéngesh palatasida guwahliq bérip, xitayda az dégende 3 neper Uyghur awstraliye puqrasining türmige tashlan'ghanliqi, biraq hazir ularning hemmisining qoyup bérilgenlikini bildürgen idi.

Toluq bet