Awstraliye parlaméntida “Uyghur dostluq guruppisi” qurulghan

Awstraliye parlaméntida 11-féwral küni “Awstraliye parlaméntidiki barliq partiyelerning Uyghur dostluq guruppisi” (AAPPGU) qurulghanliqi élan qilin'ghan.

“Uyghur dostluq guruppisi” ning qurulush xizmiti ötken yili 12-ayda élan qilin'ghan bolsimu, emma 11-féwral küni awstraliye parlaméntida ötküzülgen pa'aliyet bilen “Uyghur dostluq guruppisi” ning qurulushi resmiyleshken. Weziyettin xewerdar kishilerdin igilishimizche, “Awstraliye parlaménti Uyghur dostluq guruppisi” xizmet küntertipining asasliq nishani, awstraliye parlaméntining Uyghur irqiy qirghinchiliqini étirap qilishini qolgha keltürüsh, Uyghur mejburiy emgek mehsulatlirining awstraliye bazirigha kirishini cheklesh qanuni chiqirish, xitayning ziyankeshlikidin qéchip yürgen Uyghur musapirlirigha yardem qilishni öz ichige alidiken.

Awstraliyediki “Tengritagh Uyghur ayallar uyushmisi” ning bildürüshiche, “Uyghur dostluq guruppisi” mezkur uyushmining tirishchanliqi, awstraliye kéngesh palata ezasi we tashqiy ishlar ministiri peniy wong (Penny Wong), parlamént awam palata ezasi tony zapiya (Zappia) we andréw wallés (Andrew Wallace) qatarliq siyasiyonlarning qollishi hem hemkarliqida wujudqa chiqqan iken.

Amérika, kanada, yaponiye, en'giliye qatarliq döletlerdin kéyin, awstraliye parlaméntidimu “Uyghur dostluq guruppisi” ning wujudqa chiqishi, Uyghur mesilisini parlamént we hökümetning küntertipige élish kélishte zor ehmiyetke ige, dep qaralmaqta.

Melum bolushiche, awam palata ezasi toniy zapiya bilen andréw walés “Awstraliye parlaméntidiki barliq partiyeler Uyghur dostluq guruppisi” ning qosh re'islikini üstige alghan. Toniy zapiya bilen andréw walés, “Uyghur dostluq guruppisi” ning resmiy qurulushi munasiwiti bilen élan qilghan bayanatida, bu guruppining meqsiti “Awstraliye we dunyadiki Uyghur jama'itige tesir qiliwatqan mesililerde diyalog qurush, köngül bölüsh we diqqet qozghashni ilgiri sürüsh؛ ‛dostluq guruppisi‚ning partiyeler halqighan hemkarliqi arqiliq, kishilik hoquq, medeniyetni qoghdash, küchlük maslishish we heqiqiy özgirish élip kélish” ikenlikini bildürgen.

“Awstraliye parlaméntidiki barliq partiyeler Uyghur dostluq guruppisi”, awstraliye “Muhapizetchi” gézitining yéqinda amérika hökümiti Uyghur mejburiy emgiki sewebidin qara tizimlikke kirgüzgen xitay shirketlirining minglighan mehsulat türlirini awstraliyege import qiliwatqanliqini ashkarilap, ghulghula qozghishining arqisidinla élan qilindi.