Awstraliye hökümiti: "Tehditke uchrighan Uyghurlar derhal saqchi bilen alaqilishishi kérek"

Muxbirimiz erkin
2019-04-01
Élxet
Pikir
Share
Print

Awstraliye hökümiti xitay saqchilirining awstraliyediki Uyghurlargha tehdit sélish weqelirige inkas bildürüp, tehditke uchrighan Uyghurlarning derhal saqchigha melum qilishi kéreklikini bildürgen.

Awstraliye abk qanilining ‏‏‏30‏-mart xewer qilishiche, mezkur qanal xitay da'irilirining awstraliyediki Uyghurlar bilen ijtima'iy taratqular arqiliq alaqe qilip, ularni pasporti, shopurluq kinishkisi, xizmet ornining adrési dégendek shexsiy uchurlar bilen teminleshke mejburlighanliqini igiligen.

Xewerde, xitayning awstraliyediki Uyghurlarning uruq-tughqanlirini kozir qilip, awstraliyediki Uyghurlargha bésim ishlitiwatqanliqi, bezi Uyghurlarning xitaydiki uruq-tughqanlirining ziyankeshlikke uchrishidin ensirep, xitay da'irilirige özlirining shexsiy uchurlirini bergenliki bildürülgen.

Xewerde bayan qilinishiche, awstraliye tashqi ishlar we soda ministirliqi xitayning awstraliyediki Uyghurlargha parakendichilik séliwatqanliqigha da'ir doklatlardin xewiri barliqini bildürüp, buninggha jiddiy qarawatqanliqini tekitligen. Awstraliye tashqi ishlar we soda ministirliqining bayanatchisi: "Hökümet bu ishqa jiddiy qarap keldi, shuningdek xitay da'irilirining aldigha qoydi" dégen.

Mezkur bayanatchining bildürüshiche, "Bu jehette endishisi bar herqandaq kishi bolsa saqchi bilen alaqe qilishi kérek" iken. Xewerde yene awstraliyelik Uyghurshunas, awstraliye döletlik uniwérsitétining dotsénti maykél klarkning sözi neqil keltürülgen bolup, u xitay kompartiyesining "Chégradin halqighan bu xil bésim shekli" arqiliq awstraliyediki bir qisim jama'etlerning démokratik heq-hoquqini ishlitip, sözlishini tosuwatqanliqini bildürgen.

Xewerde bayan qilinishiche, awstraliyediki Uyghurlarning yurtidiki nurghun uruq-tughqanlirining ghayib bolushi ularda zor endishe peyda qilghan.

Awstraliyediki Uyghur jama'et erbabi nurmuhemmed mijit awstraliye hökümitining bu mesilide tedbir qollanmighanliqini tenqidlep, "Biz Uyghur jama'itining awstraliyede bixeter, chet'el hökümetlirining qorqutushi we arilishishidin xali yashishimizgha kapaletlik qilinishini telep qilimiz" dégen.

Toluq bet