Австралийәлик журналист австралийә һөкүмитиниң хитайниң уйғур “ирқий қирғинчилиқи” ға тутқан позитсийәсини тәнқид қилди

Австралийәниң “хәвәрләр” торида 5-апрел бир мақалә елан қилинип, австралийә һөкүмитиниң хитайниң уйғурларға тутқан муамилисини “ирқий қирғинчилиқи” дәп елан қилмиғанлиқи тәнқид қилинған. “бейҗиңниң вәһшийликиниң ички йүзи: америка хитай җаза лагерлириниң ирқий қирғинчилиқ икәнликини елан қилди, бирақ австралийә ундақ демәйду” мавзулуқ мақалини австралийәлик журналист шәнон молей елан қилған болуп, у җаза лагерлиридики сағлам “мәһбуслар” ниң учриған муамилисидин дуняниң ойғинишқа башлиғанлиқини билдүргән.

Апторниң тәкитлишичә, американиң уйғурлар учриған муамилини ениқ “ирқий қирғинчилиқ вә инсанийәткә қарши җинайәт” дәп елан қилиши австралийәни қийин әһвалға чүшүрүп қойған. Мақалидә, түрмә вә лагерлардики сағлам мәһбусларниң ички әзалириниң елинип, қараңғу базарда сетилиши үчүн уларға хушал өлүш пурсити берилидиғанлиқи, аялларниң басқунчилиқ, қийин-қистаққа учрайдиғанлиқи, нопусни йоқитиш үчүн йүз миңлиған аялниң туғмас қилинип, һамилидар болушиниң алди елинғанлиқи, бир йерим милйондәк кишиниң лагерларға қамилип, мәҗбурий әмгәккә селинғанлиқи тәкитләнгән.

Мақалидә йәнә, бирақ хитайниң бу җәһәттики мустәқил доклатларни рәт қилип, уйғурларға тутқан муамилисини “радикал террорчилар” ни “қайта-тәрбийәләш” дәп келиватқанлиқи, америка, канада, әнглийә вә явропа иттипақи 4 нәпәр хитай компартийә әмәлдарини җазлап, уларни җавабкарлиққа тартқанлиқи, австралийә билән йеңи зеландийә бирләшмә баянат елан қилип, бу җаза тәдбирлирини қоллиған болсиму, бирақ өзлириниң униңға иштирак қилмиғанлиқии тәнқидләнгән.