Awstraliyelik zhurnalist awstraliye hökümitining xitayning Uyghur “Irqiy qirghinchiliqi” gha tutqan pozitsiyesini tenqid qildi

Awstraliyening “Xewerler” torida 5-aprél bir maqale élan qilinip, awstraliye hökümitining xitayning Uyghurlargha tutqan mu'amilisini “Irqiy qirghinchiliqi” dep élan qilmighanliqi tenqid qilin'ghan. “Béyjingning wehshiylikining ichki yüzi: amérika xitay jaza lagérlirining irqiy qirghinchiliq ikenlikini élan qildi, biraq awstraliye undaq démeydu” mawzuluq maqalini awstraliyelik zhurnalist shenon moléy élan qilghan bolup, u jaza lagérliridiki saghlam “Mehbuslar” ning uchrighan mu'amilisidin dunyaning oyghinishqa bashlighanliqini bildürgen.

Aptorning tekitlishiche, amérikaning Uyghurlar uchrighan mu'amilini éniq “Irqiy qirghinchiliq we insaniyetke qarshi jinayet” dep élan qilishi awstraliyeni qiyin ehwalgha chüshürüp qoyghan. Maqalide, türme we lagérlardiki saghlam mehbuslarning ichki ezalirining élinip, qarangghu bazarda sétilishi üchün ulargha xushal ölüsh pursiti bérilidighanliqi, ayallarning basqunchiliq, qiyin-qistaqqa uchraydighanliqi, nopusni yoqitish üchün yüz minglighan ayalning tughmas qilinip, hamilidar bolushining aldi élin'ghanliqi, bir yérim milyondek kishining lagérlargha qamilip, mejburiy emgekke sélin'ghanliqi tekitlen'gen.

Maqalide yene, biraq xitayning bu jehettiki musteqil doklatlarni ret qilip, Uyghurlargha tutqan mu'amilisini “Radikal térrorchilar” ni “Qayta-terbiyelesh” dep kéliwatqanliqi, amérika, kanada, en'gliye we yawropa ittipaqi 4 neper xitay kompartiye emeldarini jazlap, ularni jawabkarliqqa tartqanliqi, awstraliye bilen yéngi zélandiye birleshme bayanat élan qilip, bu jaza tedbirlirini qollighan bolsimu, biraq özlirining uninggha ishtirak qilmighanliqi'i tenqidlen'gen.