Австралийә ташқи ишлар министири: «хитайниң уйғурларға тутқан муамилисидин қаттиқ әндишә қиливатимиз»

Мухбиримиз әркин
2019-07-15
Елхәт
Пикир
Share
Принт

Австралийә ташқи ишлар министири марисә пәйин хитайниң уйғурларға тутқан муамилисидин җүмлидин уйғурларни мәҗбурий әмгәккә селиватқанлиқидин «қаттиқ әндишә» қиливатқанлиқини билдүргән.

Униң 15‏-июл австралийә таратқулириға ашкарилишичә, австралийә өзиниң қош дөләт тәвәликидики пуқралириға вә уларниң аилә тавабиатлириға консул ярдими беришни тәләп қилған болсиму, лекин хитай рәт қилған. Пәйин бу сөзләрни австралийә дөләтлик радийосиниң зияритини қобул қилғанда тәкитлигән. У бир милйондин артуқ уйғурниң тутқун қилинғанлиқи һәққидики бир соалға җаваб берип: «шинҗаңниң кишилик һоқуқ вәзийитидин җүмлидин тутуп туруш орунлиридин қаттиқ әндишә қиливатимиз» дегән.

Марисә пәйин бу сөзләрни австралийәниң ABC телевизийә қанили уйғурлар һәққидә мәхсус программа ишләп, австралийәдики уйғурларниң хитай йиғивелиш лагерлирида ғайиб болған уруқ-туғқанлирини вә йиғивелиш лагерлиридики тутқунларниң хитай карханилирида мәҗбурий әмгәккә селиниватқанлиқини ашкарилиған мәзгилдә қилған. ABC Ниң программисида австралийәдики гүлнур исимлик бир уйғур аялниң «шинҗаң теббий университети» дохтурханисида сестралиқ қилидиған 38 яшлиқ һәдиси дилнурниң 2017‏-йили йолдиши билән тәң тутқун қилинип, үрүмчиниң мидоң районидики «шеңши хуаер мәдәнийәт технологийә ширкити» намлиқ бир тоқумичилиқ карханисида мәҗбурий әмгәккә селиниватқанлиқини ашкарилиған. Гүлнурниң билдүрүшичә, униң һәдиси бу йил 5‏-айда лагердин мидоң районидики тоқумичилиқ карханисида ишләшкә йөткәп апирилған. Даириләр униң һәптидә пәқәт бир қетим аилисигә қайтип, балилирини вә ата-анисини көрүшигә рухсәт қилидикән. Дилнур 6‏-айда мелбориндики сиңлиси билән үндидарда көрүшкәндә бир парчә қәғәзгә хәт йезип, «әгәр мән бу йәрдин чиқип кетәлмисәм, мениң әһвалимни хәлқара җамаәткә вә һөкүмәтләргә ашкарилаң» дегән. Дилнурниң билдүрүшичә, униң йолдишиниң һазирғичә һечқандақ из-дерики йоқ икән. Австралийәдики уйғурларниң хитайдики аилә әзалириниң тәқдири австралийә таратқулириниң изчил диққитини қозғап, һөкүмәтни буниңға җиддий көңүл бөлүшкә чақирип кәлгән иди. Марисә пәйин австралийә дөләтлик радийосида қилған сөзидә йәнә «буз юқириқи әндишимизни хитайға қәрәллик йәткүзүп туруватимиз, җүмлидин мән өткән йилқи зияритимдә биваситә оттуриға қойдум» дегән.

Пикирләр (0)
Share
Толуқ бәт