Австралийә һөкүмити хитайға уйғур ана-балини хитай чеграсидин чиқириш һәққидә чақириқ қилған

Мухбиримиз сада
2019-07-17
Елхәт
Пикир
Share
Принт

17-Июл күни австралийә ташқи ишлар министири мәрайс пәйн бейҗиңдики хитай әлчиханисиға австралийә пуқраси садам абдусаламниң хитайда қалған аяли вә балисини хитайдин чиқишқа йол қоюш һәққидә баянат елан қилған.

CNN Ниң шу күндики хәвиригә қариғанда, хитай ташқи ишлар министирлиқиниң баянатчиси гең шуаң 17-июл қилған сөзидә өзиниң австралийә һөкүмитиниң баянатини көрүп бақмиғанлиқини билдүргән.

Гең шуаң сөзидә йәнә: «әгәр австралийә һөкүмити бизни бу әһвалға мунасивәтлик тәпсилатлар билән тәминлисә, биз чоқум уларни биз әзәлдин қилип кәлгәндәк зөрүр болған ярдәм билән тәминләймиз,» дегән.

Хәвәрдә австралийә ташқи ишлар министири мәрайс пәйн садам абдусаламниң аяли вә балиси билән җәм болуши үчүн давамлиқ һәрикәт қоллинидиғанлиқини билдүргән.

Садам абдусалам 2013-йили австралийә пуқралиқиға өткән. У 2016-йили һазирқи аяли надирә өмәр билән той қилған вә 2017-йили оғли лутфияр садам туғулған. Садамниң аяли надирә австралийә пуқраси болмиғанлиқтин оғли билән биллә изчил хитайда туруп садамниң мунасивәтлик йолларни қилишини сақлиған. Һалбуки уйғур диярида 2017-йилидин башланған зор көләмлик тутқунниң тәсиридә надирә өмәр вә лутфияр садамниң чәтәлгә чиқиши чәклимигә учриған. 16-Июл садам абдусаламниң аяли вә балиси һәққидә бәргән гуваһлиқ видийоси тарқитилғандин кейин, хитай даирилири униң аялини тутуп кәткән вә үч саәт сорақ қилип қоюп бәргән.

Игилинишичә, садам абдусалам аяли вә балисини австиралийәгә әкелиш үчүн давамлиқ издәнмәктикән.

Пикирләр (0)
Share
Толуқ бәт