"CGTN" qaniligha sözligen awstraliyelik seyyah Uyghur élidiki zulumni inkar qilip zor tenqidke uchridi

Muxbirimiz irade
2020-08-13
Share

Xitayning chet'ellerge qaratqan in'gliz tilidiki teshwiqat qanili bolghan "CGTN" qanili yéqinda xitayda yashaydighan awstraliyelik bir in'gilizni ziyaret qilish arqiliq Uyghur élide zulum yoqluqini ilgiri sürmekchi bolghan.

Jérriy isimlik bu kishi mezkur ziyaret programmisida özining wilésipit arqiliq sayahet qilidighan seyyahliqini we xitay millitidin bolghan ayali bilen birge 2019-yili Uyghur élide wélisipitlik sayahet qilip baqqanliqini ilgiri sürgen. Bu kishi özining ziyariti dawamida her yerde bixeterlik tekshürüshliridin ötken bolsimu, biraq hergizmu cheklimige uchrimighanliqini, xalighan jayigha bérip süret tartqanliqini, bu jeryanda rayonda mesjitlerde ezan awazlirini anglighanliqini, kishilerning xalighanche mesjitlerge kirgenlikini, u yerde diniy bésim bar déyishning qipqizil bir yalghanliqini éytqan.

U sözide yene xitay hökümitining meschitlerni chaqqanliqini yalghan dep, turpandiki imin wang munarini buning ispati, dégen. U yene men u yerde lagérlarni körmidim, dep lagérlarning mewjutluqini we milyonlighan Uyghurning lagérlargha qamalghanliqidek pakitni ret qilghan.

Mezkur shexs yene tiwittér hésabi arqiliq mushu xildiki teshwiqatlarni tarqitiwatqan bolup, uning bu sözliri chet'ellerdiki Uyghur éli weziyiti bilen tonushluq shexslerning küchlük qarshiliqigha duch kelgen. Ular nurghun pakitlar arqiliq uning sözlirige reddiye bergen. Nurghun tiwittér qollan'ghuchiliri uning sözlirini "Shermendilik" dep tenqidligen.

Amérika indi'ana uniwérsitétining dotsénti timusiy grus xitay hökümitining Uyghurlarning tili we dinini cheklesh siyasetliri üstide mexsus tetqiqat élip barghan bir mutexessis bolup, u xitay hökümiti özi élan qilghan her türlük uqturush we resimlik pakitlargha asasen yuqiriqi kishining sözlirige reddiye bergen we uning bilen munazire qilghan. Biraq timusiyning tiwittéda körsitishiche, yuqiriqi bu atalmish awstraliyelik seyyah timosiyning so'allirigha qayil qilarliq jawab bérelmey, uni tiwittérdin chekliwetken.

"CGTN" qanili in'gliz tilida tarqitish qilidighan xitayning teshwiqat awazi bolup, u amérika hökümiti teripidin "Chet'el wakaletxanisi" dep békitilgen 9 axbarat orginining biri. U ilgirimu lagérgha qamalghan uruq-tughqanliri heqqide guwahliq bergen chet'ellerdiki Uyghurlarning tughqanlirini ulargha qarshi sözlitip widiyo tarqatqan we bu arqiliq lagérlarning mewjutluqini inkar qilmaqchi bolghan bolsimu, netijige érishelmigen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.