Xitayning awstraliyege singip kirish urunushliri zor diqqet qozghidi

Xitayning dunyada yéngidin bash kötürgen küch süpitide özining éship bériwatqan iqtisadiy quwwitini kéngeymichilik üchün serp qiliwatqanliqi yéqinda awstraliyelik mutexessis klaywi xamiltonning “Süküttiki tajawuz” namliq esiride tepsiliy we chongqur eks etti.

Aptorning qarishiche, xitay hökümiti nöwette awstraliyening hemmila sahesige, jümlidin axbarat, siyaset, medeniyet-ma'arip, soda qatarliq sahelirige öz tesirini körsitish we singip kirishke urunmaqta iken. Ular mushu arqiliq awstraliye hökümitini qorchaq hökümetke aylandurup qoyushni, shu arqiliq awstraliyening musteqilliqini tozutuwétishni istimekte iken.

U mushundaq omumiy we xeterlik bir yüzlinishni awstraliyeliklerge eslitish üchün mushundaq bir kitab yézip chiqqanliqini bayan qilghan. U bu heqte söz qilip: “Men bu kitab arqiliq awstraliyeliklerni oyghitishni, ulargha ular duch kéliwatqan omumiy xeterni hemde néme üchün xitay kompartiyesining awstraliyeni nishan qiliwatqanliqini chüshendürüshni oylidim” dégen.

Halbuki, uning bu heqte mushundaq bir zor hejimlik eserni yézishimu unche asan'gha chüshmigen. U bu ishqa tutush qilghan haman xitay da'iriliri uning péyige chüshken. Hetta uning esirini neshr qilmaqchi bolghan neshriyatmu xitay bilen adawetliship qalmasliq üchün, bu kitabni neshr qilish pilanini bikar qilmaqchimu bolghan. Emma axiri u bu eserni neshr qilishqa muweppeq bolghan hemde awstraliyeliklerge ularning qandaq bir xeterge yüzliniwatqanliqini ongushluq eskertishke qadir bolalighan.