Хитай даирилири уйғур районида ахбаратчилиқниң муқимлиқни өлчәм қилишини тәләп қилди

Мухбиримиз әркин
2016-11-04
Share

4‏-Ноябир үрүмчидә уйғур аптоном райониниң 17‏-нөвәтлик мухбирлар байрими мукапат йиғини өткүзүлгән. Йиғинда уйғур аптоном районлуқ партком тәшвиқат бөлүминиң башлиқи тйән вен тәбрик сөзи қилип, уйғур районида ахбаратчилиқ хизмити иҗтимаий муқимлиқ вә мәңгүлүк әминликни чиқиш қилиши керәкликини билдүргән.

Хитай ахбарат васитилириниң хәвәр қилишичә, тйән вен йәнә, "ахбаратчилар партийә вә хәлқниң зувани болуштәк муқәддәс вәзиписини толуқ ада қилип, тоғра нәзәрийә йөлинишидә давамлиқ чиң туруши" керәкликини тәкитлигән.
Мәзкур йиғин чеграсиз мухбирлар тәшкилати тизимлик елан қилип, хитай рәиси ши җинпиңни "ахбарат әркинликиниң күшәндиси" дәп җакарлаштин бир күн кейин ечилған. Чеграсиз мухбирлар тәшкилати дунядики ахбарат әркинликигә изчил хилаплиқ қиливатқан 35 шәхс вә тәшкилатни бу тизимликкә киргүзгән.

Бу тәшкилат хитайниң уйғур районида учур вә торни қаттиқ контрол қилип, уйғур хәлқиниң пикир баян қилиш, учурға еришиш әркинликигә хилаплиқ қиливатқанлиқини илгири сүргән. Хитай һөкүмити йеқиндин буян арқа-арқидин бәзи бәлгилимиләрни чиқирип, тор вә иҗтимаий таратқуларни контрол қилишни күчәйткән. У, бу бәлгилимиләрдә, чәкләнгән торларға там атлап киргән кишиләрниң 2‏-дәриҗилик террорлуқ билән җазалинидиғанлиқини елан қилған.

Лекин тйән венниң йиғинда илгири сүрүшичә, "шинҗаңда ахбарат хизмәтчилири иҗтимаий муқимлиқ, мәңгүлүк әминликтин ибарәт бу омумий нишан үчүн яхши җамаәт пикри тәйярлаш вәзиписини үстигә алған."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт