Xitay da'iriliri Uyghur rayonida axbaratchiliqning muqimliqni ölchem qilishini telep qildi

4‏-Noyabir ürümchide Uyghur aptonom rayonining 17‏-nöwetlik muxbirlar bayrimi mukapat yighini ötküzülgen. Yighinda Uyghur aptonom rayonluq partkom teshwiqat bölümining bashliqi tyen wén tebrik sözi qilip, Uyghur rayonida axbaratchiliq xizmiti ijtima'iy muqimliq we menggülük eminlikni chiqish qilishi kéreklikini bildürgen.

Xitay axbarat wasitilirining xewer qilishiche, tyen wén yene, “Axbaratchilar partiye we xelqning zuwani bolushtek muqeddes wezipisini toluq ada qilip, toghra nezeriye yölinishide dawamliq ching turushi” kéreklikini tekitligen.
Mezkur yighin chégrasiz muxbirlar teshkilati tizimlik élan qilip, xitay re'isi shi jinpingni “Axbarat erkinlikining küshendisi” dep jakarlashtin bir kün kéyin échilghan. Chégrasiz muxbirlar teshkilati dunyadiki axbarat erkinlikige izchil xilapliq qiliwatqan 35 shexs we teshkilatni bu tizimlikke kirgüzgen.

Bu teshkilat xitayning Uyghur rayonida uchur we torni qattiq kontrol qilip, Uyghur xelqining pikir bayan qilish, uchurgha érishish erkinlikige xilapliq qiliwatqanliqini ilgiri sürgen. Xitay hökümiti yéqindin buyan arqa-arqidin bezi belgilimilerni chiqirip, tor we ijtima'iy taratqularni kontrol qilishni kücheytken. U, bu belgilimilerde, cheklen'gen torlargha tam atlap kirgen kishilerning 2‏-derijilik térrorluq bilen jazalinidighanliqini élan qilghan.

Lékin tyen wénning yighinda ilgiri sürüshiche, “Shinjangda axbarat xizmetchiliri ijtima'iy muqimliq, menggülük eminliktin ibaret bu omumiy nishan üchün yaxshi jama'et pikri teyyarlash wezipisini üstige alghan.”