“Bazféd” axbarat tori: “Uyghur élidiki az dégende 135 lagérda ishlepchiqirish karxanisi qurulghan”

Amérikadiki “Bazféd” namliq axbarat orni tekshürüsh élip bérip, xitayning Uyghur élidiki az dégende 135 lagérida ishlepchiqirish karxanilirining qurulghanliqi, Uyghurlarning bu orunlarda nezerbent qilinipla qalmay, belki yene mejburiy emgekke sélinidighanliqini bildürgen. “Bazféd xewerliri” ning bildürüshiche, ular bu uchurlargha hökümet höjjetlirini, sün'iy hemrah süretlirini analiz qilish we kishilerni ziyaret qilish arqiliq érishken bolup, bu heqtiki analizlar ular bayqighan orunlarning ichide az dégende 135 orundiki lagérning ishlepchiqirish karxanisi barliqini körsitip bergen.

Xewerde bu orunlardiki karxanilarda keng kölemlik mejburiy emgekning yolgha qoyuluwatqanliqi éniq ikenlikini, shuningdek Uyghur élide lagérlarning ichi-sirtidiki karxanilarning hemmisining oxshash xaraktérge ige ikenliki tektilen'gen. Xewerde bildürüshiche, ular sun'iy hemrah süriti arqiliq bayqighan bir orundiki lagér we uning ishlepchirish karxanisining kölimi 21 milyon kwadrat fét bolup, uning kölimi ford aptomobil shérkitining michigan shtatidiki “Riwér rog” aptomobil ishlepchirish mu'essesining kölimidinmu nechche milyon kwadrat fét chong iken.

Xewerde yene washin'gtondiki C4ADS namliq ammiwi teshkilatning sanliq melumatini neqil keltürülgen bolup, mezkur ammiwi teshkilat Uyghur élidiki lagérlarning ichi we sirtida karxana qurghan 1500 dek xitay shirkitining tizimlikini turghuzghan iken. Xewerde bu shirketlerning 92 sining import-ékisport bilen shughullinidighanliqi, ularning ichidiki “Jixu'a-7555” namliq bir shirketning herbiy kiyim-kéchek ishlepchiqirip, xitay azadliq armiyesi, qoralliq saqchi qisimi we j x organlirini kiyim-kéchek bilen teminleydighanliqini bildürgen.