Uyghur kishilik hoquq orgini Uyghur ayallirining weziyiti heqqide bayanat élan qildi

Muxbirimiz irade
2017.03.08

Amérikidiki Uyghur kishilik hoquq orgini, yeni Uyghur kishilik hoquq qurulushi 8-mart küni xelq'ara ayallar bayrimi munasiwiti bilen bayanat élan qilip, xelq'ara jem'iyetni Uyghur ayallirining kishilik hoquq weziyitige köngül bölüshke chaqirdi.

Amérikaning washin'gton shehirige jaylashqan mezkur organ öz bayanatida,Uyghur ayallirining xitay hökümitining Uyghur élide yürgüzüwatqan qattiq bésimigha qarshi chiqip, Uyghurlarning kishilik hoquqini qolgha keltürüsh herikitining aldinqi sépide turuwatqanliqini tekitlidi.

Bayanatta, Uyghur milliy herikiti rehbiri rabiye qadir xanim, “Uyghur biz” tor bétidiki pa'aliyetliri üchün türmige solan'ghan atikem rozi, ghayib oghlining dawasini qilip türme jazasigha uchrighan patigül ghulam, zhurnalist mehbube ablesh, pasport élish hoquqi cheklen'gen bortalaliq rabixan musa anilar misal qilinip, Uyghur ayalliri, jümlidin Uyghurlar uchrawatqan kishilik hoquq depsendichilikliri yorutup bérilgen.

Uyghur kishilik hoquq qurulushi bayanatida Uyghur ayallirining ijtima'iy tengsizliklerdin sirt yene, xitay da'irilirining Uyghurlargha yürgüzüwatqan “Milliy kemsitish, dini bésim, pilanliq tughut siyasetliriningmu biwasite qurbanlirigha ayliniwatqanliqi”ni bildürüp, xelq'ara jama'etni Uyghur ayallirining weziyitige köngül bölüshke, xitay hökümitini özi qol qoyghan alaqidar xelq'araliq qanunlargha emel qilishqa chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.