Uyghur rayonidiki ayallar we balilarning hoquqi qoghdaldimu?
“Xitay xewerliri tori” ning 9-mart künidiki xewiridin melum bolushiche, “8-Mart ayallar bayrimi” munasiwiti bilen Uyghur rayonida “70 Yildin buyan shinjangdiki ma'arip, ayallar, balilar ishliri tereqqiyati we ularning hoquq-menpe'etining kapaletke ige bolushi” dégen témida muhakime yighini ötküzülgen.
-
Muxbirimiz jewlan
2022-03-09 -
-
-
“Xitay xewerliri tori” ning 9-mart künidiki xewiridin melum bolushiche, “8-Mart ayallar bayrimi” munasiwiti bilen Uyghur rayonida “70 Yildin buyan shinjangdiki ma'arip, ayallar, balilar ishliri tereqqiyati we ularning hoquq-menpe'etining kapaletke ige bolushi” dégen témida muhakime yighini ötküzülgen.
Yighinda “Shinjang ayallar birleshmisi” ning re'isi aynur exmet söz qilip: “Ayallarni hörmetlesh we balilarni asrash jem'iyetning medeniy tereqqiyatining muhim belgisi. Shinjangda ayallar we balilar ishliri jush urup rawajlandi, ularning qanuniy hoquq-menpe'etliri qoghdaldi” dégen؛ buninggha misal qilip, ayallarning ornining yuqiri kötürülgenliki, ayal kadirlarning köpeygenlikini tilgha alghan. Uningdin bashqa, “Shinjang ijtima'iy penler akadémiyesi milletler tetqiqat instituti” ning bashliqi li shyawshiya söz qilip, yéngi xitay qurulushtin burun Uyghur rayonida yéngi tughulghan bowaqlarning ölüsh nisbitining yuqiri ikenliki, 2020-yiligha kelgende bu nisbetning eng töwen chekke chüshürülgenlikini bayan qilghan. U yene Uyghur rayonidiki yesli ma'aripining güllen'genlikini tilgha élip: “1949-Yil shinjangda 2 yesli bar idi, 2020-yiligha kelgende 768 yesli quruldi” dégen.
Közetchilerning qarishiche, bu yighinda teshwiq qilin'ghanlar ré'alliqning neq eksiche bolup, Uyghur ayalliri we baliliri jem'iyetning eng ajiz qatlimi bolush süpiti bilen xitayning 70 yildin buyan dawam qilip kéliwatqan siyasiy heriket we xilmu xil basturushlirining qurbani bolup kelgen. Bolupmu 2017-yildin kéyin bashlan'ghan irqiy qirghinchiliqta xitayning eng éghir hujum nishani ayallar we balilar bolghan. Türme we lagérlarda dehshetlik xorluqqa uchrighan ayallar, ata-anisidin ayriwétilip yétimxanilargha solan'ghan balilar buning ispati iken. Bu yerde déyilgen 768 yeslining ichide ene shundaq yétimxanilarning barliqi éniq bolup, 500 mingdin köp balining bu yétimxanilarda, atalmish “Yataqliq mektepler” de xarliq we zarliq ichide yashawatqanliqi, xitayche terbiye éliwatqanliqi melum bolghanidi.