Xotenning kériye nahiyesige 180 ming adem qétimliq sighimchanliqqa ige ayrodrom sélinishi diqqet qozghidi

Xitay hökümiti xotenning kériye nahiyesige yéngi bir ayrodrom sélishni qarar qilghan. Shinjang gézitining 16-iyul tarqatqan bir xewiridin qarighanda, kériye nahiyesige yéngi ayrodrom sélish qararini xitay döletlik tereqqiyat we islahat komitéti tekshürüp tetqiq qilish netijiside békitken bolup, uninggha merkizi hökümettin 7 milyard 600 milyon yüen meblegh sélinidiken.

Xewerde körsitilishiche, kériye ayrodromi yilliq 180 ming adem qétim yoluchi toshush we zor kölemde yük toshushtin ibaret sighimchanliqqa maslashturulup sélinidiken.

Téxi yéqinda xitay taratquliri bu yil 2‏-iyuldin bashlap, xoten bilen chongching otturisida ayropilan qatnaydighanliqini élan qilghanidi.

Xitay hökümitining yéqindin buyan Uyghur élining jenubidiki wilayetlerdiki hawa we tashyol qatnishini del 2 milyondek Uyghur qatarliq milletlerni yighiwélish lagérlirigha qamap, Uyghurlar zich olturaqlashqan jaylar chölderep qalghanda kücheytishi diqqet qozghaydiken. Chet'ellerdiki Uyghur közetküchilerning qarishiche, xitayning 2017‏-yili 2‏-ayda bashlan'ghan omumyüzlük lagérgha qamash herikitide xoten asasliq zerbe bérish nishanlirining biri bolghan, yene bu rayon xitay hökümitining ichkiri ölkilerdin köplep xizmetchi xadim qobul qilip, köchmen yötkeydighan asasliq rayonlirining birige aylan'ghanidi.

Nöwette, xitay hökümiti Uyghur élige, bolupmu jenubtiki Uyghurlar zich olturaqlashqan rayonlargha sayahetchi jelp qilish teshwiqatini hessilep ashuruwatqan bolup, bu jaylargha köplep xitay ahalilirining kélip orunlishishi, makanlishishi teshebbus qiliniwatqanliqi, buning üchün qatnash shara'itlirini yaxshilashqa ehmiyet bériliwatqanliqi inkas qilinmaqta.