Baghrash köli xitaylarning “Béliq ambiri” gha aylandi

Xitay metbu'atlirida izchil “Dölitimizdiki eng chong ichki quruqluq tatliq su köli” dep teriplinip kelgen baghrash köli yéqindin buyan xitaylarning neziride “Seddichinning sirtidiki eng chong béliq makani” dep teshwiq qilinishqa bashlidi.

“Xelq tori” ning 25-awghusttiki xewiride éytilishiche, baghrash köli nöwette sün'iy köpeytish usulini qollinish arqiliq esirler boyi teklimakanning munglirigha guwahchi bolup kelgen baghrash kölini xitay béliqchilirining eng chong baqmichiliq meydanigha aylandurghan. Nöwette bu kölde baqmichiliq bilen shughulliniwatqanlarning sani 60 mingdin éship ketken.

“Tengritagh tori” ning bu heqtiki xewiride éytilishiche, nöwette ular torgha chüshken béliqlardin töt kilogram (texminen 10 qadaq)din éghir kelgenlirini ilghiwélip, bashqilirini kölge qoyuwétidiken. Shü chingshüy isimlik bir xitay béliqchi muxbirlargha bu heqte söz qilip “Her küni 500-600 kilogram béliq tutimen. Bir yilda béliqchiliqtinla 70-80 ming som kirim qilimen” dégen. Xewerde éytilishiche, baghrash kölidiki béliqlarning türi 32 xilgha yétidighan bolup, Uyghurlar diyaridiki eng chong béliqchiliq bazisi iken.

Halbuki téxi yéqinqi mezgillergiche baghrash kölining xitay zawutliridin chiqqan “Bulghan'ghan sularni qoyuwétish ambiri” bolup kelgenliki munazire témisi bolup kelgenidi. Emdilikte bolsa xitay hökümitining “Baghrash kölini tazilap kishilerge bext yaritish” shu'arining emeliyette béliqchiliq üchün bolghanliqi ashkara boldi. Dunya Uyghur qurultiyining mu'awin re'isi perhat yorungqash söz qilip: “Uyghur yashliri ‛éshincha emgek küchi‚ dégen namda nechche yüz somlum ayliq ma'ash bilen ichkirige yötkiliwatqanda xitay köchmenliri Uyghurlarning ana makanida béliqchiliq qilip milyonlap pul tapmaqta” dédi.