Pirézidént tramp polat-tömür we alyumin mehsulatlirigha qoshumche 25 pirsent baj qoyidighanliqini élan qilghan

Amérika pirézidénti tramp xitay mallirigha 10 pirsent baj qoyup buni ötken hepte resmiy ijra qilishining arqisidin 9-féwral küni yene chet elning polat-tömür we alyumin mehsulatlirigha 25 pirsent baj qoyidighanliqini élan qilghan.

Amérika memliketlik ammiwi radiyosi (NPR) we bashqa amérika taratqulirining xewer qilishiche, pirézidént tramp 9-féwral ayropilanda amérikaning yéngi orli'an shehride ötküzülgen memliketlik zeytun top derijidin tashqiy chémpiyonluq musabiqisini körüshke kétiwétip, muxbirlargha “Amérikagha kirgen herqandaq polat-tömürge 25 pirsent baj qoyulidighanliqi”, buning “Alyumin mehsulatlirinimu öz ichige alidighanliqi” ni éytqan. Pirézidént trampning bildürüshiche, u 11-yaki 12-féwral künliri buninggha qarshi öch élish xaraktérlik jaza tedbiri yürgüzgen döletlerge qarita inkas xaraktérlik baj tedbiri élan qilishni pilanlimaqta iken. Xewerlerde uning “Eger ular bizdin baj alsa, bizmu ulardin baj alimiz, bu mushundaq bolidu” dégenliki, “Her bir döletke qarap bolidu” dégenlerni tilgha alghanliqi qeyt qilinmaqta.

Xewerlerde, bu tedbirdin méksika bilen kanadaning eng köp tesirge uchraydighanliqi qeyt qiliniwatqan bolsimu, emma trampning bu qarari xitayning 10-féwraldin bashlap bir qatar amérika mallirigha öch élish xaraktérlik tamozhna béji qoyushqa bashlishining harpisida élan qilin'ghan. Pirézidént tramp ötken hepte féntanil sewebidin xitay mallirigha 10 pirsent baj qoyghanliqini élan qilghandin kéyin, xitay hökümitimu xam néfit, suyuqlandurulghan teb'iy gaz, mashinasazliq we bashqa bir qisim amérika mallirigha 10 pirsenttin 15 pirsentkiche baj qoyidighanliqini élan qilghan.

Melum bolushiche, xitay tashqiy ishlar ministirliqining bayanatchisi go jyakün, 10-féwral muxbirlargha “Biz amérikaning xata herikitini toxtitishini, yeni iqtisad hem soda ishlirini siyasiylashturushi we uni qoralgha aylandurushni toxtitishini ümid qilimiz” dégen.

NPR Ning bildürüshiche, amérika bilen xitayning soda sürkilishi, xitay iqtisadi intayin müshkül weziyette chüshüp qélip, öy-mülük baziri kirizisqa patqan, qerz köpiyip, pul paxalliqi yüz bergen, xitay iqtisadi turghun weziyettin qutulalmaywatqan bir peytte partlighan.