Bangladishliq musulmanlar Uyghurlar üchün adalet telep qilip namayish qilghan

Washin'gtondin muxbirimiz jewlan teyyarlidi
2023.10.04

“Dakka munbiri géziti” ning xewer qilishiche, xitayning “Dölet bayrimi” bolghan 1-öktebir küni, bangladishtiki musulmanlar Uyghur musulmanliri üchün heq-adalet telep qilip namayish qilghan.

 Xewerde éytilishiche, xitaydiki Uyghurlar dawamliq basturushqa uchrawatqan, xelq'arada buninggha qarshi tenqidler dawamlishiwatqan weziyette, bangladishtiki “Ölima mashayix perishad teshkilati”  (NUMP)  dakkadiki beytul mukerrem jamesining etrapida 300 kishilik chong namayish teshkillep, xitaydin bu basturushni toxtitishni telep qilghan.

Mezkur namayishqa “Ölima mashayix perishad teshkilati” ning re'isi bilayet hüseyin elfrozi (Belayet Hossain Al-Firozi), katipi mufti esedulla zakir (Mufti Asadullah Zakir) qatarliqlar qatnashqan bolup, ular namayishta qilghan sözide dunya musulmanliri we bashqa chong döletlerge xitab qilip, xitayning Uyghurlargha élip bériwatqan wehshiyane qilmishlirini tosushqa chaqirghan.

Xewerde körsitilishiche, dangliq Uyghur alimesi, mazarshunas rahile dawutning xitay da'iriliri teripidin ömürlük qamaqqa höküm qilinishi xitayning Uyghur serxillirini közdin yoqitish suyiqestining tipik bir misali süpitide xelq'arada küchlük tenqid sadaliri peyda qilghan.  Uyghur musulmanlirigha qilin'ghan bu ziyankeshlikning dawamlishishi  amérika bashchiliqidiki gherb döletlirining uni “Irqiy qirghinchiliq” dep atishining toghra bolghanliqini ispatlap bergen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.