Байинғолин области «қара күчләрни тазилаш, рәзилликни түгитиш» намида 162 кишини җазалиған

2019-04-15
Елхәт
Пикир
Share
Принт

Хитай даирилириниң уйғур районида қозғиған «қара күчләрни тазилаш, рәзилликни түгитиш» намидики бастуруш һәрикити уйғур вә қазақлар зич олтурушлуқ районларда шиддәтлик давам қилмақта.

«Шинҗаң гезити» ниң 15‏-апрел хәвәр қилишичә, мәзкур һәрикәт башланғандин буян байинғолин областида 17 делоға четишлиқ 162 киши қолға елинип, сот мәһкимиси тәрипидин қаттиқ җазаланған. Областлиқ оттура сот мәһкимиси 12‏-апрел күни ачқан очуқ сотниң өзидила 5 делоға четишлиқ 81 кишигә һөкүм елан қилинған. Лекин хәвәрдә, тутқунларға конкрет қандақ җаза берилгәнлики тилға елинмиған. Хәвәрдин мәлум болушичә, тутқунларниң ичидә базарни монопол қиливелиш, башқиларни содиға мәҗбурлаштәк иҗтимаий қилмиш садир қилған кишиләрдин башқа йәнә хәлқ ичидики ихтилапни һәл қилишта салачилиқ қилған, диний тәсир вә җамаәт күчидин пайдиланған, асаси қатлам һакимийитини контрол қиливалған, дәп әйибләнгән кишиләрму бар икән. Бу һәрикәт ичкири өлкиләрдә нишанлиқ иҗтимаий җинайәтчиләргә зәрбә беришкә қаритилған болсиму, лекин уйғур районида сиясий һәрикәткә айланған.

Уйғур кишилик һоқуқ тәшкилатлириниң илгири сүрүшичә, бу һәрикәттә партийә, һөкүмәт, идарә-җәмийәт, кәспий орунлар вә иҗтимаий районлардики «икки йүзлимичи» кадирлар, диний етиқади вә миллий хаслиқи күчлүк кәспий хадимлар вә аһалиләр бастурулуш нишаниға айланған. Байинғолин бу һәрикәтни әң актип иҗра қилған област вә вилайәтләрниң биридур. Мәлум болушичә, бу һәрикәт уйғур районидики башқа вилайәт ‏-областлардиму кәң қанат яйдурулмақтикән. Йеқинда алтай вилайитиниң чиңгил наһийәсидә сот ечилип, бу һәрикәттә қолға елинған 13 нәпәр қазақ яшқа һөкүм елан қилинған. Мәмурбек исимлик бир яш қазақ тиҗарәтчи «қара күчләр» ниң йетәкчиси, дәп әйиблинип, 20 йиллиқ кесилгән. Йәрлик қазақ пуқралириниң радийомизға билдүрүшичә, мәмурбек бу наһийәдики атақлиқ тиҗарәтчи болуп, у илгири мәзкур наһийәдики 10 мәшһур яшниң бири болуп баһаланғаникән.

Хитайниң «қара күчләрни тазилаш, рәзилликни түгитиш» намидики мәмликәт характерлик бу һәрикити уйғур районида 2 милйондәк уйғур, қазақ вә башқа мусулман хәлқләр йиғивелиш лагерлириға қамилип, хәлқараниң қаттиқ тәнқидигә учраватқан мәзгилдә елип берилмақта.

Пикирләр (0)
Share
Толуқ бәт