Pirézidént tramp amérikaning igilik bayliqi fondi qurushni buyruq qildi

Amérika pirézidénti donald tramp 3-féwral küni memuriy buyruqqa imza qoyup, kéler yilghiche amérikaning igilik bayliqi fondi qurushni testiqlighan. Trampning igilik bayliqi fondi qurush qarari, xitayning chet'ellerge qaratqan ijtima'iy taratqu supisi tik-tokni sétiwélishning yoshurun teyyarliqimu, dégen perezlerni peyda qilmaqta.

Amérika dölet bixeterliki endishisi sewebidin sabiq pirézidént jow baydénning dewride qanun chiqirip, tik-tokni bu yil 19-yanwar künigiche sétishni, eger satmisa uning amérikadiki meshghulatini chekleshni qarar qilghan. Lékin pirézidént tramp bu yil 20-yanwar wezipige olturghandin kéyin, bu qanunni ijra qilishni 75 kün kéchiktürgenidi. Igilik bayliqi fondi nurghun döletlerde, bolupmu ottura sherq we xitaygha oxshash asiya döletliride mewjut bolghan hökümetning kontrolluqidiki meblegh fondi bolup, bu tunji qétim amérikaning shu xildiki igilik bayliqi fondi qurushi hésablinidiken.

“Roytérs agéntliqi” ning bildürüshiche, pirézidént trampning memuri buyruqida, amérika maliye ministirliqi we soda ministirliqining 90 kün ichide “Fondining méxanizmi, meblegh sélish istratégiyesi, uning qurulmisi we bashqurush shekli” ni öz ichige alghan qurulush pilanini yollishi telep qilin'ghan. Pirézidént tramp muxbirlargha “Méningche, bu döletlik igilik bayliqi fondining barliqqa kélishi peqet waqit mesilisige baghliq bolup qalghan. Biz bu fond üchün nurghun bayliq toplaymiz” dégen.

“Roytérs” ning bildürüshiche, hökümet emeldarliri bu fondining qandaq meshghulat élip baridighanliqi, uning meblighining qandaq teminlinidighanliqini éytmighan bolsimu, pirézidént tramp ilgiri uning meblighining “Tamozhna béji we bashqa eqliy nersiler” din teminlinishi mumkinlikini éytqan.

“Roytérs agéntliqi” ning xewiride yene pirézidént trampning tik-tokni igilik bayliqi fondining sétiwélishi mumkinlikini ilgiri sürgenliki qeyt qilinmaqta. Pirézidént tramp “Biz bir ishlarni qilimiz, tik-tokqa qarita biz toghra kélishim hasil qilalisaq qilimiz, bolmisa qilmaymiz……belkim biz uni igilik bayliqi fondigha élishimiz mumkin” dégen. Lékin roytérsning xewiride körsitilishiche, igilik bayliqi fondining qurulushi üchün amérika dölet mejlisining testiqini élish telep qilinishi mumkin iken.