BBC Хәвәрлири: «мениң пәрзәнтлирим қәйәрдә?»

Мухбиримиз сада
2019-07-05
Елхәт
Пикир
Share
Принт

Уйғур дияридики әһвалларни нәқ мәйдан көрүнүшлири арқилиқ сиртқи дуняға көрситип келиватқан BBC радийо ширкити йеқинда райондики ата-анисидин мәҗбурий айриветилгән уйғур пәрзәнтлириниң из-дерики һәққидә бир видийолуқ хәвәр тарқатқан.

4-Июл тарқитилған мәзкур видийолуқ хәвәргә қариғанда, BBC ниң мухбири җон садворс түркийәдә яшаватқан уйғурларниң уйғур районида қәп қалған вә йоқап кәткән пәрзәнтлири һәққидә бәргән гуваһлиқлирини аңлиғандин кейин, районға берип тәкшүрүш елип барған. Бу җәрянда хитай һөкүмити тәрипидин «балилар йәслиси» дәп аталған җайларниң әтрапи пүтүнләй сақчиларниң қоршавида болғанлиқтин йеқин берип сүрәткә елиш имканийити болмиған. Һалбуки, йирақтин у йәрләрниң пүтүнләй тор симлар билән қоршалғанлиқи, әтрапта пүтүнләй көзитиш камерасиниң орнитилғанлиқини байқиған. Қизиқ йери бу хилдики «йәсли» ләр җаза лагерлириниң йениға қурулған икән.

Мәзкур видийолуқ хәвәрдә йәнә мухбир райондики аталмиш «йәсли» ләрниң сүний һәмраһ сүритидин бу җайларниң көлиминиң җаза лагерлириға охшаш интайин тез сүрәттә кеңийиватқанлиқини баян қилған. Бу йәрдә тилға елинған йәнә бир қизиқ нуқта шуки, райондики хитай даирилири тәрипидин «қоғдаш мәркизи» дәп аталған җайлардур. Мәлум болушичә, бундақ җайлардин һазирға қәдәр йүздин артуқи қурулған болуп, буларда 10 миңлиған уйғур пәрзәнтлири йепиқ һаләттә «тәрбийә» ләнмәктикән.

Уйғур дияридики җаза лагерлириниң тез сүрәттә көпийишигә билән биргә аталмиш «йәсли» ләрниңму зор көләмдә кеңийиши көзәткүчиләрниң әндишисини қозғимақта.

Пикирләр (0)
Share
Толуқ бәт