Teywen tashqi ishlar ministirliqi tiwittir arqiliq xitayni Uyghur élidiki lagérlarni taqashqa chaqirghan

Muxbirimiz irade
2019-07-08
Élxet
Pikir
Share
Print

Xitay hökümitining Uyghur élide yolgha qoyuwatqan lagér tüzümi we bashqa éghir zulum siyasetliri teywen we xongkong qatarliq jaylardimu zor naraziliq qozghawatqanliqi melum.

Yéqinda en'gliyening BBC radiyo-téléwiziyesi teripidin ata-aniliridin mejburiy ayriwétilgen Uyghur baliliri heqqide ishlen'gen widiyogha qarita teywenning tashqi ishlar ministiri joséf wu tashqi ishlar ministirliqining tiwittirdiki resmiy hésabi arqiliq inkas qayturghan.

U, tiwittirdiki inkasida "Kompartiyening yuqiri derijilik rehberliri balilirini démokratik gherb döletliride oqutidu. Biraq xitay Uyghur balilirini yighiwélip terbiyeleydu. Qandaq bir hökümet balilarni tartiwalidu? xitay, lagérlarni taqap, balilarni öyige qaytur" dep yazghan.

Yéqinda yene, 5-iyul ürümchi qirghinchiliqining 10 yilliq xatire küni munasiwiti bilen teywende muxbirlarni kütüwélish yighini uyushturulghan bolup, uningda yaponiye Uyghur jem'iyitining re'isi ilham mehmut ependi, teywen-Uyghur dostluq jem'iyiti bashliqi lin bawxu'a ependi we xitay démokratiye instituti re'isi séng jyenyu'en qatarliqlar söz qilghan.

Radiyomizning teywendiki bu muxbirlarni kütüwélish yighinidin igilishiche, yighinda söz qilghan yuqiridiki zatlar birdek dégüdek Uyghur élidiki hazirqi éghir weziyettin teywenning etisini körüwélishqa bolidighanliqini, xitay kompartiyesining hem Uyghurlar üchün hem teywen xelqi üchün oxshash xewp ikenlikini tekitligen.

Yighinda yene, gherb hökümetliri teripidin iqtisadiy tereqqiyat netijiside erkinlishidu, dep perez qilin'ghan xitay kommunist hakimiyitining, eksiche téximu hakimmutleqleshkenliki, "Chong xitaychiliq" tin ibaret irqchiliqni teshebbus qilip, xitay bolmighan milletlerge éghir zulum séliwatqanliqi we buninggha qarshi dunyaning choqum tedbir élishi kéreklikidek mesililer otturigha qoyulghan.

Melum bolushiche, yuqiridiki bu axbarat élan qilish yighini "Teywen-sherqiy türkistan jem'iyiti" teyyarliq komitéti bilen xitay démokratiye instituti teripidin uyushturulghaniken.

Toluq bet