B d t diki mutexessisler xitaygha mektub yézip, xitayning Uyghurlargha tutqan mu'amilisige bolghan endishilirini bildürgen

Muxbirimiz erkin
2019-11-08
Élxet
Pikir
Share
Print

B d t ning bir qanche mutexessisler guruppisi yéqinda xitay hökümitige mektub yézip, ularning Uyghurlargha tutqan mu'amilisige alaqidar bir qatar mesililerge qarita endishilirini ipadiligen.

Mektubta xitayning ghayib bolghan Uyghurlarning aqiwiti we xitayning "Térrorluqqa qarshi turush qanuni" ning Uyghur aptonom rayonida ijra qilinish ehwali qatarliq bir qatar mesililerge chüshenche bérishi telep qilin'ghan. Bu mektub b d t mutexessislirining yéqinqi bir yil ichide xitay hökümitige yazghan Uyghurlar heqqidiki 2‏-mektubidur. Ular ötken yili 11‏-ayda bir qétim mektub yézip, bu mesililerge chüshenche bérishni telep qilghan bolsimu, lékin xitay hökümiti ularning mektubigha héchqandaq jawab bermigen idi.

Bu qétimqi mektubni b d t kishilik hoquq kéngishining mejburiy ghayib qiliwétish ishliri xizmet guruppisi, ma'arip hoquqi xizmet guruppisi, pikir we ipade erkinliki xizmet guruppisi, az sanliq milletler ishliri xizmet guruppisi qatarliq 10 xizmet guruppisidiki mutexessisler yazghan.

Mektupta Uyghurlarni ghayib qiliwétish mesilisi heqqide toxtitilip, "'Qayta-terbiyelesh orunliri' ning otturigha chiqishi bilen küchiyishke bashlighan nahayiti nurghun sandiki Uyghurning mejburiy ghayib bolushigha qarita endishilirimni ipadileymiz. Ghayib bolghanliqi ilgiri sürüliwatqan yérim milyondek kishining qeyerde ikenliki hazirghiche melum emes. Mejburiy ghayib qiliwétish, a'ile ezalirining iqtisadi, ijtima'iy we medeniyet heqlirige, jümlidin ayallargha ejellik tesir qilmaqta," déyilgen. 

Mektupta yene "Xitay térrorluqqa qarshi turush qanuni" we uning Uyghur rayonida ijra qilinish ehwali heqqide toxtilip, qanunsiz tutqun qilish, Uyghur kimlikini jinayetleshtürüsh we zorawanliq tüsidiki nazaret tedbirlirige qarita endishilirini ipadiligen. Mektubning axirida xitay hökümitining "Térrorluqqa qarshi turush qanuni" ni Uyghur rayonida qandaq ijra qiliwatqanliqi, shexslerning bi'ométirik uchurini qoghdashqa qandaq kapaletlik qiliwatqanliqi qatarliq 11 xil su'algha jawab bérishi telep qilin'ghan.

Toluq bet